David Perdomo

David Perdomo é actor, cómico e guionista. Formouse na escola Casa Hamlet da Coruña e completou a súa formación con mestres da comedia internacional como Leo Bassi.

Ao longo da súa carreira participou en programas da Televisión de Galicia como Land Rober, Catro Gatos ou Malicia Noticias, ademais de colaborar en espazos de ámbito estatal como No le digas a mamá que salgo en la tele ou La noche D en Televisión Española.

O seu estilo directo, irreverente e imprevisible converteuno nun dos cómicos máis persoais do panorama galego. A súa popularidade medrou especialmente a través dos seus monólogos e dos personaxes humorísticos cos que retratou diferentes estereotipos da sociedade galega.

Xunto con Xosé A. Touriñán acadou un enorme éxito de público durante o confinamento de 2020 coas súas conversas en directo a través de Instagram, que máis tarde se transformaron no espectáculo teatral Corentena. A partir desa experiencia xurdiron tamén Corentena · Game Over e, posteriormente, Amoriños.

Perdomo desenvolve ademais proxectos propios como o podcast El Nicho, no que combina humor, entrevistas e conversa sobre cultura, comedia e actualidade. Actualmente compaxina a xira de Amoriños co seu espectáculo en solitario O monólogo de David Perdomo.