Russ é o nome artístico de Marta Gilino, dj consolidada no mundo da música e recoñecida axitadora da escena electrónica galega. A súa proposta electrónica conta con múltiples influencias que mesturan tradición e innovación, baixo un selo identitario común que marca a súa esencia.
Esta artista galega conta con multitude de actuacións dentro e fóra de Galicia, con especial presenza en Portugal. Así, destaca a súa participación no Caparica Surf Fest de Lisboa ou na Sala Mouco do Porto. Tamén deixa pegada na cidade que habita, Compostela, e participa en multitude de eventos: Mulleres na Batida, Wos Festival, Feito a Man, Mercado da Estrela, La Melona Fest, Delas Jam… Ademais, tamén ten participado en diferentes ciclos de espectáculos organizados pola Sala Numax ou a Xunta de Galicia, entre outros. En 2022 lanzou o seu primeiro EP ZZEN e, xa en 2023, encargouse do espazo sonoro en directo da obra de teatro Códice K.
