O roubo do Códice Calixtino regresa aos teatros

Co inicio do ano, Códice K volve saír de xira. O espectáculo dirixido por Tito Asorey estreouse o pasado marzo en Compostela, a cidade que viviu de preto a desaparición do prezado manuscrito, e fixo rir ao público que ateigou o Teatro Principal nas dúas funcións programadas. Regresa agora á capital galega, pero desta volta o escenario será o Auditorio de Galicia, cunha función prevista para o 9 de febreiro.

Logo de pasar por diferentes vilas e cidades, o espectáculo chegou no outono á Coruña enchendo o Teatro Colón. O 19 de xaneiro haberá unha nova posibilidade para descubrir todos os segredos que ocultou un dos casos máis rocambolescos da nosa historia recente.

Códice K é un texto de Manuel Cortés que revisita o máis grande “true crime” de Galicia pero faino coa visión das mulleres que rodearon a historia real, na que só semellaba haber homes: o electricista, o deán, o arcebispo, o xuíz… Lucía Veiga, Marita Martínez, Graciela Carlos e Patricia Castrillón métense na pel de múltiples personaxes femininas para contar todo o que nunca se contou deste caso. Ás catro actrices acompáñaas sobre o escenario a dj e produtora Russ, que achega á peza unha trepidante ambientación musical.

Todas as datas