Manuel Cortés (Vilardevós, 1966) é actor, guionista e escritor.
Nos anos 90, Cortés incorpórase ao grupo teatral Chévere e vincúlase á Sala Nasa de Santiago de Compostela. No seu labor como escritor ten participado na xestación de moitas obras de Chévere como Eroski Paraíso, As Fillas Bravas, Viaxe ao País dos Ananos, Eurozone, Citizen e HumANA, mais tamén na construción doutras obras para diferentes compañías, artistas e grupos como Voadora, Redrum, Antón Coucheiro ou Mofa e Befa.
No teatro, como actor desenvolve multitude de papeis en case todas as producións da compañía Chévere. Recentemente, formou parte do elenco de Recortes, caneos e outras formas de driblar e é o responsable da dramaturxia de Códice K.
Cortés tamén escribe para diversos formatos televisivos como Land Rober, A Casa da Conexa, Libro de Familia ou As Leis de Celavella. Ademais, actúa como protagonista en series como As Leis de Celavella, Pepe o Inglés e O Sabor das Margaridas e en longametraxes como O Ouro do Tempo e Rafael.
