Manuel Cortés, finalista nos Premios María Casares polo texto de ‘Códice K’
Os gañadores dos premios, organizados pola Asociación de Actrices e Actores de Galicia, coñeceranse na gala que terá lugar o 21 de marzo no Teatro Rosalía de Castro da Coruña.
Manuel Cortés durante a presentación de 'Códice K' no Museo das Peregrinacións de Santiago. Foto: Aigi Boga
A Asociación de Actrices e Actores de Galicia deu a coñecer, nun acto celebrado no Auditorio de Galicia, as obras e profesionais finalistas da XXVIII edición dos Premios María Casares de Teatro. En total, 19 obras competirán por facerse co galardón e, entre elas, aparece ‘Códice K‘.
Manuel Cortés opta ao María Casares a mellor texto orixinal polo seu labor en ‘Códice K‘. Un espectáculo no que o actor, poeta e dramaturgo achégase ao roubo do Códice Calixtino desde os códigos do televisivo true crime. O espectáculo, estreado en marzo de 2023, vén de completar unha extensa xira por toda Galicia na que obtivo unha boa acollida por parte do público, enchendo en dúas ocasións o Teatro Principal de Santiago, o Teatro Colón da Coruña e unha función no Auditorio de Galicia.
Nesta edición dos María Casares, na que concorrían máis de 47 espectáculos e 350 profesionais, Manuel Cortés optará ao premio a mellor texto orixinal xunto con Gustavo del Río, por ‘Mosca’, e Laura Porto, por ‘A nai’. Os gañadores coñeceranse na gala que se celebrará o 21 de marzo no Teatro Rosalía de Castro da Coruña, moita sorte a todos os finalistas.
NOTICIAS RELACIONADAS
Lamatumbá, finalista nos XIII Premios Martín Códax da Música
A banda ourensá opta ao galardón na categoría de Orquestras, Grupos e Música de Verbena, reafirmando o seu lugar como un dos grandes referentes da festa e da música popular galega.
‘Amoriños’ chega a Cee e Vigo con cheos absolutos e suma novas funcións en Pontevedra e A Coruña
A xira de ‘Amoriños’, continúa esta fin de semana en Cee e Vigo, con case todas as entradas esgotadas. O espectáculo amplía ademais o seu percorrido con novas datas en Pontevedra e unha quinta función no peche da Coruña.
Xosé A. Touriñán súmase a ‘Chisteria Colectiva’, unha das grandes apostas do EMHU 2026
O humorista participa no espectáculo colectivo xunto a outros grandes nomes da comedia estatal, unha estrea absoluta no marco do encontro que xa colgou o cartel de entradas esgotadas para as súas dúas funcións en Palexco.