Laura Mahía (Santiago de Compostela, 1995) é deseñadora gráfica, ilustradora e directora de arte. Graduada en Belas Artes pola Universidade de Vigo, Laura Mahía formouse posteriormente en ilustración e animación na Universidade de Kingston, en Londres, e en Motion Graphics na Lightbox Academy.
A pesar da súa xuventude, o seu portfolio conta con numerosos traballos de animación para marcas como Deleite ou ABANCA. Ademais, é responsable da imaxe e deseño do proxecto transmedia Xeosónica, así como do deseño gráfico e a dirección de arte do Castelo Conta. Tamén realizou proxectos de ilustración para o Concello de Coruña e marcas como Gadis ou Deleite. É tamén a responsable da dirección de Bechos, primeira serie de animación de Undodez para a Televisión de Galicia.
