Xa están dispoñibles os primeiros capítulos de Fila 1. Butaca G, o novo proxecto audiovisual da Televisión de Galicia (TVG) que achega o teatro galego aos fogares de toda a comunidade. Este programa, producido por Tamboura, ofrece unha selección de oito espectáculos teatrais gravados no auditorio do Grove, combinando o teatro en directo coa difusión televisiva. Unha das características principais é a presenza de público nas representacións e a participación de artistas invitados que presentan cada episodio.
Entre as obras que forman parte deste proxecto están os espectáculos Somos Criminais 3 e Códice K, ambas producidas por Ainé e dirixidas por Tito Asorey. A comedia Somos Criminais 3 está protagonizada por Carlos Blanco e Xosé A. Touriñán, mentres que Códice K presenta un texto de Manuel Cortés e conta cun elenco de actrices formado por Lucía Veiga, Marita Martínez, Graciela Carlos e Patricia Castrillón, ademais da música en directo de Russ.
Asemade, tamén podemos ver obras como Puede ser mi gran noche de Teatro en Vilo, presentada por Xosé Antonio Touriñán, que ofrece a súa particular introdución á obra cun ton humorístico. Outras compañías e artistas que tamén forman parte do programa son Cultura Activa co seu espectáculo Saaabor!, Luis Zahera co seu monólogo Chungo, Talía Teatro con Unha inimiga do pobo, Rebordelos con Amantis e Malasombra Producións con DEP, unha comedia de morte.
O obxectivo principal deste proxecto da TVG é poñer en valor o traballo realizado polas compañías galegas, os seus actores e actrices, ofrecendo unha plataforma para que o teatro chegue a todos os fogares. A través deste formato innovador, preténdese darlle máis visibilidade ás artes escénicas ao tempo que se recoñece o talento de directores como Cándido Pazó ou Tito Asorey, que participan en varias das obras.
