A xira de ‘Moi Animal’ continúa colgando o cartel de esgotado
Despois das primeiras datas en Cee, Pontevedra e Vilalba, ‘Moi Animal’ continúa o seu percorrido cunha grande acollida do público. Este venres chega a Ourense, onde as entradas para as dúas funcións previstas están esgotadas, igual que acontece con varias das próximas paradas.
Xosé A. Touriñán na estrea de 'Moi Animal' en Cee. Fotografía: Aigi Boga
A xira de Moi Animal, o novo monólogo de Xosé A. Touriñán, continúa este venres 30 de outubro en Ourense, onde o Auditorio Municipal acollerá dúas funcións, ás 20.30 e ás 23.00 h. As entradas para ambos os pases están esgotadas, unha resposta que confirma o interese que está a espertar o espectáculo nas diferentes localidades polas que pasa.
Desde o comezo do percorrido, a acollida do público está a marcar o ritmo da xira. Tras a estrea en Cee e as funcións en Pontevedra e Vilalba, o monólogo chega agora a Ourense co aforo completo nos dous pases. Unha resposta que agradecemos especialmente e que acompaña o inicio desta nova etapa escénica de Touriñán.
A demanda continúa tamén nas próximas datas. O Grove, o 7 de novembro, e Vigo, o día 8, xa teñen as localidades esgotadas. En Lugo, o 27 de novembro, Burela, o día 28, e Santiago o 29, quedan as últimas entradas dispoñibles. O percorrido continuará en decembro por Noia e Vilagarcía de Arousa, antes de chegar á Coruña, cidade na que Moi Animal pechará esta primeira xira os días 26 e 27.
A proposta parte dunha pregunta aparentemente sinxela: que relación mantemos os seres humanos co resto dos animais? En Moi Animal, Touriñán percorre, desde o humor, os costumes e as contradicións dunha especie que protexe, humaniza e converte os animais en parte da súa familia, pero que tamén mantén con eles relacións cheas de paradoxas.
A xira de Moi Animal continuará por Galicia ata finais de decembro. Toda a información sobre as datas e as entradas dispoñibles está en moianimal.gal.
NOTICIAS RELACIONADAS
‘A Lacena Pequena’ remata en Boqueixón o seu primeiro percorrido
O proxecto cultural itinerante pechará esta fin de semana a súa primeira ruta, despois de pasar por cinco concellos. A última parada será este sábado 31 de outubro en Lestedo, cunha xornada que combinará gastronomía, patrimonio, música e cultura popular.
Touriñán chega hoxe a Vilalba con ‘Moi Animal’
O Auditorio Municipal Carmen Estévez acollerá dúas funcións do novo monólogo do humorista, que aborda en clave de comedia a nosa relación cos animais e as contradicións da especie humana.
‘A Lacena Pequena’ chega a Portas cunha xornada adicada aos oficios, a poesía e a música
A Fábrica da Azucreira acollerá este sábado unha programación con demostracións de cestería, costura e tornería, un recital poético e un concerto da banda infantil da Escola de Música de Portas.