‘Amoriños’ encara a súa recta final cunha intensa fin de semana en Pontevedra

A xira de primavera de Amoriños, o espectáculo creado e interpretado por Xosé A. Touriñán e David Perdomo, entra nunha fase decisiva despois de máis de dous meses percorrendo Galicia con funcións marcadas polo humor, a improvisación e a participación do público.

Tras a súa estrea o 14 de marzo en Vilagarcía, a proposta pasou por numerosas localidades: Santiago, Ponteareas, Verín, Lugo, Ribadeo, Vilalba, Cee, Vigo, Narón e Ourense, consolidando en cada parada unha dinámica xa habitual: teatros cheos, encontros inesperados sobre o escenario e pases que mudan cada noite en función do público.

Agora, a xira detense esta fin de semana en Pontevedra, no Auditorio Sede Afundación, cun total de catro funcións. O sábado 30 de maio ofreceranse dous pases, ás 18.30 e ás 21.00, ambos xa coas entradas esgotadas. O domingo 31 haberá outras dúas funcións, ás 18.00 e ás 20.30: a primeira tamén está esgotada, mentres que para a última quedan aínda as derradeiras localidades dispoñibles.

A proposta mantén así o seu ritmo habitual, nun formato que converte cada función nunha experiencia diferente. Sobre o escenario, Touriñán e Perdomo constrúen en directo un peculiar ‘First Dates’ á galega no que a comedia nace da improvisación e da interacción constante co público, facendo que ningún pase sexa exactamente igual ao anterior.

Tras Pontevedra, o camiño conduce directamente ao gran peche da xira, que terá lugar na Coruña, no Teatro Colón, entre o 5 e o 7 de xuño. Serán seis funcións en total: o día 5 ás 20.30 e 23.00 (ambas esgotadas), o día 6 ás 18.30 e 21.00 (tamén esgotadas) e o día 7 ás 18.00 (esgotada) e ás 20.30, que acaba de saír á venda e aínda conta con entradas dispoñibles.

Esta recta final confirma o percorrido do espectáculo, que foi medrando función a función, mantendo a súa esencia viva, adaptándose a cada público e a cada cidade. Todo, para ofrecer moito amor, e moito humor.