‘Amoriños’ chega ao Noroeste Estrella Galicia cunha edición especial en Santa Margarida
Despois de percorrer Galicia con máis de corenta funcións e milleiros de espectadores e espectadoras, ‘Amoriños’ chegará ao escenario de Santa Margarida cunha edición especial chea de sorpresas no marco da programación da 39 edición do Festival Noroeste Estrella Galicia.
Cartel do 39º Festival Noroeste Estrella Galicia, feito por Julia Lago.
Amoriños, o espectáculo creado e interpretado por Xosé A. Touriñán e David Perdomo, continúa ampliando o seu percorrido e suma unha nova parada moi especial: o vindeiro 9 de agosto chegará ao Parque de Santa Margarida, dentro da programación da 39º edición do Festival Noroeste Estrella Galicia.
A proposta, que ao longo dos últimos meses foi enchendo teatros e auditorios de todo o país, formará parte dun dos grandes eventos culturais do verán coruñés cunha función de carácter especial, preparada para a ocasión e con algunhas sorpresas que se irán desvelando proximamente.
A incorporación de Amoriños ao Noroeste Estrella Galicia supón un novo encontro entre unha das propostas escénicas galegas máis soadas da tempada e un festival que leva case catro décadas convertendo A Coruña nun gran escenario ao aire libre.
A 39º edición do Festival Noroeste Estrella Galicia celebrarase a partir do 5 de agosto en diferentes espazos da cidade, con máis de corenta artistas que encherán praias, prazas, parques e lugares emblemáticos da Coruña. A programación combina grandes artistas de diferentes ámbitos, cunha presenza destacada da escena local e unha importante representación feminina.
O cartel desta edición inclúe nomes como Xosé Lois Romero & Aliboria, Rusowsky, Catuxa Salom ou Bala, entre moitos outros, nunha programación que aposta pola diversidade de estilos e pola convivencia entre artistas consolidados e novos talentos, mantendo a esencia dun festival aberto, e pensado para achegar a música e a cultura a todo tipo de públicos.
A función de Amoriños en Santa Margarida prolongará así a viaxe dun espectáculo marcado pola improvisación, o humor e a participación do público para tratar o tema máis universal: o amor. Sobre o escenario, Touriñán e Perdomo constrúen en directo unha proposta na que ningún pase é igual ao anterior, facendo que cada encontro se convirta nunha experiencia única.
As entradas para esta función estarán dispoñibles proximamente.
NOTICIAS RELACIONADAS
Vedra, Boqueixón, A Rúa, Portas e Triacastela, as cinco paradas do primeiro percorrido de ‘A Lacena Pequena’
A primeira parada do proxecto será en Ponte Ulla, onde a Lacena desenvolverá unha programación cultural durante os días 18 e 19 de setembro. A iniciativa continuará posteriormente por concellos de menos de 5.000 habitantes.
‘A Lacena Pequena’ comeza en Vedra a súa primeira viaxe
O proxecto itinerante impulsado por Ainé e E-ló Arquitectura levará programación cultural a pequenos núcleos de poboación e dará a coñecer mañá en Ponte Ulla as cinco paradas do seu primeiro percorrido.
‘Aquí Tou!’ regresa ás táboas cunha función especial da man de Touriñán
O monólogo máis persoal do humorista volverá ao Porriño o 26 de setembro cunha función que ten como obxectivo apoiar á Rondalla que participou na película Rondallas.