Xosé A. Touriñán incorpórase ao elenco da terceira e última tempada de ‘Clanes’

Netflix vén de confirmar o futuro lanzamento da terceira e última temporada de Clanes, a serie producida por Vaca Films que se adentra no universo do narcotráfico galego e que se converteu nun dos títulos destacados da ficción recente na plataforma.

A nova entrega volve contar con Clara Lago e Tamar Novas nos papeis de Ana e Daniel, xunto a un elenco que reúne a grandes nomes da escena actoral galega, como Luis Zahera, que interpreta a El Curilla ou Xosé A. Touriñán no papel de Nilo. Tamén figuran actores e actrices como Melania Cruz, Miguel de Lira ou Chechu Salgado, reforzando así a presenza de talento galego nunha produción de alcance internacional.

Nesta terceira tempada, a historia sitúase pouco máis dun ano despois dos acontecementos anteriores. Ana vive agora baixo identidade protexida, lonxe de Cambados, mentres intenta reconstruír a súa vida xunto á súa nai e a súa filla. Pola súa banda, Daniel afastouse tamén do mundo do narcotráfico, aínda que continúa atrapado pola súa relación co pasado e pola súa obsesión por recuperar a Ana.

O equilibrio do universo dos Padín vese ameazado pola chegada dun clan albanés que tenta facerse co control das descargas de droga na zona, o que volve situar os protagonistas no centro dun conflito que rompe calquera posibilidade de estabilidade en Cambados.

A serie está dirixida por Ángeles Huerta e Javier Rodríguez, cun guión de Jorge Guerricaechevarría, mantendo o ton de thriller criminal que caracterizou as entregas anteriores e afondando nas consecuencias persoais e familiares do narcotráfico.

Con esta terceira tempada, Clanes pecha a súa historia, culminando un relato marcado polos vínculos familiares, as lealdades rotas e a tensión permanente entre o pasado e o presente.