Máis improvisación oral para despois do verán: ‘Territorio Regueifa’ suma tres novas funcións
Despois da súa estrea absoluta en Carballo e do seu paso por distintos escenarios, 'Territorio Regueifa' continúa o seu percorrido con tres novas datas xa pechadas para despois do verán. A xira fará parada no Val do Ubra, Ames e, por primeira vez, cruzará as fronteiras de Galicia para chegar ao Centro Galego de Bizkaia, en Barakaldo.
Territorio Regueifa seguirá levando a palabra improvisada aos escenarios este outono. O espectáculo ten xa confirmadas tres novas funcións que consolidan o percorrido dun espectáculo que combina teatro, humor, música e improvisación arredor dunha das tradicións orais máis singulares da cultura galega.
A primeira cita será o 17 de outubro no Auditorio Municipal do Val do Ubra. A continuación, o espectáculo vivirá un momento especialmente significativo o 6 de novembro, cando chegue ao Centro Galego de Bizkaia, en Barakaldo, naquela que será a súa primeira función fóra de Galicia. A xira continuará o 19 de novembro na Casa da Cultura de Bertamiráns, no concello de Ames. As entradas para as tres funcións estarán dispoñibles proximamente.
Desde a súa estrea absoluta en febreiro, Territorio Regueifa foi construíndo un percorrido que o levou por distintos escenarios do país, achegando a regueifa a públicos moi diversos. A proposta nace coa vontade de reivindicar esta forma de improvisación oral como un patrimonio vivo, capaz de dialogar coa escena contemporánea sen perder a súa esencia popular.
Sobre o escenario, Lupe Blanco, Josinho da Teixeira e Manolo Maseda guían ao público por unha viaxe que percorre as orixes da regueifa, a súa evolución e a súa presenza na actualidade. Ao longo da función conviven escenas teatrais, momentos de improvisación, música en directo e humor, nun espectáculo que tamén reserva un papel protagonista á participación do público.
A proposta recrea momentos históricos e imaxina situacións tan inesperadas como un informativo televisivo contado en verso ou a incorporación das mulleres ao mundo da improvisación rimada, demostrando que a regueifa continúa sendo unha ferramenta viva para contar o presente desde a retranca, a creatividade e a palabra.
NOTICIAS RELACIONADAS
‘Territorio Regueifa’ continúa o percorrido fóra de Galicia con dúas funcións en Asturias
O espectáculo chegará a Xixón e Vegadeo os días 27 e 28 de novembro, respectivamente, nunha nova parada da xira que está levando a improvisación oral galega a outros territorios.
Unha nova etapa para ‘Territorio Regueifa’
O espectáculo de Lupe Blanco, Manolo Maseda e Josinho da Teixeira ofrecerá tres funcións durante esta fin de semana en Barakaldo e Laudio. Será a primeira vez que a proposta saia de Galicia desde a súa estrea en febreiro.
Zaragoza, a próxima parada do humor de Touriñán
O humorista actuará este sábado no Teatro de las Esquinas, nun percorrido que o levará de novo a Madrid en novembro. A xira continuará en 2027 con novas funcións en Madrid, Valencia, Santander e León.



