Arrinca o partido no Salón Teatro de Santiago

Comeza a tempada con ‘Recortes, caneos e outras formas de driblar’, que se estrea este xoves. O espectáculo baseado en textos de Nacho Carretero permanecerá na capital galega ata o 23 de outubro

O equipo de Recortes sae a xogar este xoves 29 de setembro, nun primeiro encontro que terá lugar no Salón Teatro de Santiago. A pretempada foi dura mais o elenco formado por Xosé A. Touriñán, Manuel Cortés, Christian Escuredo, Xoán Fórneas, Isabel Garrido e Sergio Zearreta, está en forma e quecendo para saír ao escenario. Porén, o traballo cuxo resultado veremos neses noventa minutos (máis o desconto, máis os penaltis, máis o que faga falta) vén de moito máis atrás ca os ensaios.

Esta obra producida por Ainé e o Centro Dramático Galego comeza coa última investigación de Nacho Carretero sobre o lado máis descoñecido e escuro do fútbol profesional, conta coa dramarturxia de José L. Prieto para facer do xornalismo teatro. Pero, se realmente nos queremos remontar ao comezo de todo, deberiamos falar de que esta fórmula xa se probou con éxito na produción de Fariña, o espectáculo teatral. O equipo que non sairá ao campo pero sen o cal “nada disto sería posible” —como dirá algún cando lle concedan o Balón de Ouro— complétano José Faro ‘Coti’ na escenografía, Laura Iturralde na iluminación e audiovisuais, Vadim Yukhnevich na composición musical, Laura Baena no deseño do vestiario, Mónica García como coreógrafa, Sara Rey como axudante de dirección, Claudia Peña como xefa de produción… Un equipo completísimo dirixido por Tito Asorey.

‘Recortes’ xirará por Galicia

Tras a estadía no Salón Teatro de Santiago entre o 29 de setembro e o 23 de outubro, Recortes, caneos e outras formas de driblar percorrerá Galicia. As cidades e vilas nas que xa está confirmado que haberá representacións son Carballo, Ourense, Vigo, Narón, Pontevedra, Cangas, Burela, Lugo, Vilagarcía, A Coruña e Ferrol. En recortes.gal pódense consultar as datas e horarios, así como adquirir entradas para as actuacións.