‘Recortes’ pon a grada en pé na súa estrea

A estrea da nova produción de Ainé e o CDG dá comezo á temporada do mellor xeito posible: cos aplausos, os risos e a boa crítica do público. As representacións no Salón Teatro continuarán de mércores a domingo ata o 23 de outubro

Recortes, caneos e outras formas de driblar gañou a liga no primeiro partido. Unha victoria tan clara foi como foi grazas á actuación do elenco e ao traballo do amplísimo equipo, pero tamén polo público que asistiu á estrea no Salón Teatro de Santiago. No ritmo diario da compostelá Rúa Nova entrou o rebumbio e a alegría propia da chegada dun momento agardado. Xente sorrindo á camara diante do photocall, a chegada de convidados, os primeiros en entrar para tomar asento e os que alongan o tempo ata escoitar o aviso, ramos de flores…

Á estrea desta produción de Ainé e o Centro Dramático Galego acudiron persoas do mundo da cultura, como Blanca Cendán, Jorge Coira ou Quico Cadaval, e representantes públicos como o conselleiro de Cultura, Educación, Formación Profesional e Universidades, Román Rodríguez; o director xeral de Políticas Culturais, Anxo Lorenzo; o director da Agadic, Jacobo Sutil; e o secretario xeral de Política Lingüística, Valentín García. Ademais, entre outros persoeiros do mundo do fútbol, asistiron os presidentes dos principais equipos galegos: Antonio Couceiro, do Deportivo; Carlos Mouriño, do Celta; Tino Saqués, do Lugo; Lupe Murillo, do Pontevedra; e José Criado Labajo, do Rácing.

Na noite de onte houbo o típico, mais tamén o atípico. Algo víase vir, esperábase, pola orixinalidade de tratar o fútbol dende o teatro con base nun traballo xornalístico, o de Nacho Carretero. Facer rir evidenciando coa esaxeración as dinámicas do fútbol máis visibles significaría quedar nun punto inicial do que ‘Recortes’ procuraba. Dende o amor por este deporte e rexeitando o desprezo que moitas veces recibe por ser moi popular, por ser unha forma de ocio que gusta a moitísima xente, a obra tamén trata das sombras do fútbol profesional, cada día máis mercantilizado.

Recortes é un espectáculo que fala de nós como parte dun mundo complexo do que temos o noso anaquiño de responsabilidade, pero no que asoma o bo e a posibilidade de cambio. O ocio ten que ser para desfrutar, tanto nos estadios coma nos teatros, pero tamén lle debemos esixir un chisco de fondura.

Ao remate desta primeira representación de Recortes, o director Tito Asorey subiu ao escenario xunto ao elenco, Xosé A. Touriñán, Manuel Cortés, Christian Escuredo, Xoán Fórneas, Isabel Garrido e Sergio Zearreta, e todo o equipo técnico, aos que o aplauso do público fixo saír dúas veces para recoller o agradecemento sementado.

Levar o fútbol aos teatros

Do mesmo xeito que aconteceu con Fariña, o espectáculo teatral, Recortes leva sobre as táboas unha investigación xornalística, a última de Nacho Carretero na que afonda no mundo do fútbol profesional para descubrir o lado máis descoñecido e escuro deste. Dende o comezo do proceso de traballo, o escritor e xornalista coruñés xa tiña en mente dous formatos: un libro e unha obra teatral. O primeiro aínda non se publicou, pero xa se pode desfrutar da versión dramática.

Un deporte de masas e unha arte do que moitas veces se ten a idea de exclusiva ou elevada. Mesturar dous tipos de entretemento diferentes nesta produción non é máis ca unha forma de cuestionar uns prexuízos que prexudican tanto ao fútbol, ao rebaixar a consideración que se lle dá a algo que gusta a tanta xente, coma ao teatro, ao afastar a xente dunha forma de ocio ao tinguila de complexidade e ata elitismo. Recortes, caneos e outras formas de driblar vén demostrar que o importante é desfrutar e deixar que queden os complexos para quen non saiba facelo. Xogar sempre no mesmo sitio só é para quen bota pachangas, cruzar campos é o que fai bos xogadores e xogadoras.

Onde ver ‘Recortes’

Ata o 23 de outubro, de mércores a domingo, Recortes, caneos e outras formas de driblar representarase no Salón Teatro de Santiago. Despois, continuará a xira por diferentes cidades e vilas do país. Os lugares confirmados polos que pasará a obra son Carballo, Ourense, Vigo, Narón, Pontevedra, Cangas, Burela, Lugo, Vilagarcía, A Coruña e Ferrol.