‘Territorio Regueifa’ leva a improvisación oral ata Burela
Despois do seu paso por distintos escenarios, 'Territorio Regueifa' continúa o seu camiño cunha nova función na Mariña. O espectáculo, protagonizado por Lupe Blanco, Manolo Maseda e Josinho da Teixeira, chega este sábado a Burela para converter o escenario nun espazo de humor, palabra improvisada e celebración colectiva arredor da tradición oral galega.
Josinho da Teixeira durante unha función do espectáculo. Fotografía: Aigi Boga.
A Casa da Cultura de Burela acollerá este sábado 23 de maio ás 20.00 unha nova función de Territorio Regueifa, unha proposta escénica que mestura teatro, música, humor e improvisación para achegar ao público o universo da regueifa desde unha mirada contemporánea, participativa e festiva.
Dirixido por José L. Prieto e interpretado por Lupe Blanco, Manolo Maseda e Josinho da Teixeira, o espectáculo constrúe unha viaxe pola historia e pola evolución da improvisación oral galega, combinando divulgación, escenas teatrais e momentos de creación en directo. A función percorre distintas situacións arredor da palabra improvisada, desde as orixes da regueifa ata a súa presenza na actualidade, incorporando tamén reflexións sobre o papel das mulleres neste ámbito ou xogos escénicos que trasladan a improvisación a contextos inesperados.
Cada representación convértese nun acontecemento único, marcado pola enerxía do directo e pola interacción co público. A proposta rompe as fronteiras entre o escenario e o patio de butacas, convidando ás persoas asistentes a participar dunha experiencia colectiva na que a retranca, a música e a creación oral ocupan o centro.
Tras a súa estrea absoluta en Carballo,Territorio Regueifa continúa así a súa xira levando esta disciplina a novos espazos e públicos, reivindicando a vixencia dunha tradición que segue viva e en transformación.
As entradas para a función poderán adquirirse presencialmente na billeteira da Casa da Cultura de Burela antes do inicio do espectáculo.
NOTICIAS RELACIONADAS
Lamatumbá gaña o Premio Martín Códax da Música na categoría de Orquestras, Grupos e Música de Verbena
A banda ourensá vén de ser recoñecida na XIII edición dos Premios Martín Códax da Música, nun momento marcado polo regreso aos escenarios coa proposta ‘LAMATUMBÁ… E XA ESTÁ!’.
‘Amoriños’ despídese na Coruña cunha intensa fin de semana de seis funcións
O espectáculo de Xosé A. Touriñán e David Perdomo chega ao seu gran peche de xira no Teatro Colón. Entre o 5 e o 7 de xuño ofrecerán seis funcións, das que só queda dispoñibilidade para a derradeira sesión do domingo ás 20.30.
‘Amoriños’ encara a súa recta final cunha intensa fin de semana en Pontevedra
O espectáculo de Touriñán e Perdomo entra no último tramo da súa xira de primavera tras máis de dous meses de funcións por Galicia.