‘Territorio Regueifa’ encara a súa estrea en Carballo

Queda menos dun mes para que Territorio Regueifa vexa por fin a luz sobre o escenario. O espectáculo abrirá mañá, xoves 22 de xaneiro ás 10.00, a venda de entradas para a súa estrea absoluta, que terá lugar o venres 6 de febreiro no Pazo da Cultura de Carballo. As entradas estarán dispoñibles a través da plataforma Ataquilla.com.

A proposta, dirixida por José L. Prieto, inicia así unha nova etapa despois dun camiño marcado pola espera e pola resistencia. A estrea prevista no pasado mes de outubro tivo que ser cancelada por unha baixa médica imprevista, o que obrigou a adiar o primeiro encontro co público apenas uns días antes da función.

Mentres tanto, Territorio Regueifa mantívose vivo a través dunha presentación especial no Culturgal 2025, onde Manolo Maseda, Josinho da Teixeira e Lupe Blanco ofreceron unha pequena mostra do espectáculo e anunciaron a nova data de estrea. Aquel momento, serviu como punto de relanzamento dun proxecto que agora retoma por fin o seu camiño escénico e abre a conta atrás para un reencontro moi agardado coa regueifa no escenario.

Improvisación, humor e palabra

O elenco está formado por Manolo Maseda, Lupe Blanco e Josinho da Teixeira, tres voces recoñecidas da regueifa contemporánea, que levan á escena unha tradición viva, en constante transformación e moi ligada á identidade cultural galega.

Territorio Regueifa é un espectáculo de teatro, humor, música e improvisación no que dous regueifeiros e unha regueifeira introducen o público na arte da regueifa, nas súas orixes, na súa evolución e na súa vixencia na actualidade. A proposta combina divulgación, escenas teatrais e participación directa, facendo do público unha parte activa da experiencia e ofrecéndolle unha pequena iniciación á improvisación oral cantada.

O espectáculo recrea distintas situacións escénicas arredor da palabra improvisada: desde a primeira regueifa da historia ata a incorporación da muller ao mundo da disputa rimada, pasando por xogos co presente e coa linguaxe. O percorrido constrúe unha viaxe pola tradición oral galega que remata nunha gran festa musical, convertindo o espazo nunha celebración colectiva.

Coproducida polo FIOT Carballo, Ainé e o Centro Dramático Galego, a estrea en Carballo marcará o inicio dunha xira que continuará por distintos puntos de Galicia nos vindeiros meses. Próximamente anunciaranse novas datas e funcións.

A información completa sobre o calendario irá actualizándose na web do espectáculo: territorioregueifa.gal.