‘Amoriños’ amplía a súa segunda xira con novas datas e funcións
Tras a boa acollida das primeiras datas anunciadas, o espectáculo continúa medrando sobre as táboas. O seu percorrido de primavera incorpora agora novas paradas en Vilagarcía, Santiago, Ourense, Narón e Cee.
Xosé A. Touriñán durante unha función de 'Amorinos'. Fotografía: Aigi Boga
A segunda xira de Amoriños, o espectáculo creado e interpretado porXosé A. Touriñán e David Perdomo, continúa collendo forza de cara á primavera. Tras o éxito da primeira etapa, marcada polos cheos e a resposta entusiasta do público, o espectáculo suma agora novas funcións e cidades, cun percorrido que se estende ao longo de varios meses polos auditorios e teatros do país. Unha oportunidade para que máis persoas poidan reencontrarse co humor, a emoción e a improvisación que caracterizan a proposta.
As novas funcións incluirán paradas en Vilagarcía de Arousa (14 de marzo ás 21.00 no Auditorio Municipal), Santiago de Compostela (15 de marzo ás 18.00 no Auditorio de Galicia), Cee (segundo pase o 8 de maio ás 23.00 na Casa da Cultura), Narón (16 de maio ás 21.00 no Padroado da Cultura) e Ourense (22 de maio ás 20.30 no Auditorio Municipal), que se engaden ás funcións previamente anunciadas en Ponteareas (10 de abril), Lugo (18 de abril), Vilalba (1 de maio), Vigo (9 de maio) e Pontevedra (30 de maio), completando un percorrido extenso e diversificado.
En Amoriños, Touriñán e Perdomo exploran o sentimento máis universal – e tamén o máis imprevisible-: o amor. Cunha combinación de comedia, improvisación constante e emoción, cada función remata por converterse nun encontro único, distinto do anterior. A complicidade entre os intérpretes e a interacción directa co público fan que cada pase sexa unha experiencia viva e participativa, construíndo o espectáculo no momento e xunto á resposta das persoas espectadoras.
A ampliación desta segunda xira confirma o bo momento de Amoriños que, tras consolidarse na súa primeira etapa, agora continúa ofrecendo máis encontros, máis cidades e novas oportunidades para que o amor, na súa versión máis caótica, divertida e imprevisible, volva facer das súas sobre as táboas.
As entradas están xa á venda a través da web do espectáculo: www.amorinos.info
NOTICIAS RELACIONADAS
Xosé A. Touriñán presenta ‘Moi Animal’, o seu novo monólogo
O humorista estrea unha nova proposta escénica arredor da nosa relación cos animais e das contradicións da especie humana. A xira comezará en outubro e percorrerá once localidades galegas.
A Coruña acolle a programación do Noroestiño, a proposta familiar do 39º Festival Noroeste Estrella Galicia
A programación infantil do Festival Noroeste Estrella Galicia volverá aos Xardíns de Méndez Núñez do 5 ao 9 de agosto con sete propostas de música e artes escénicas para público familiar.
Xa á venda as entradas para a función especial de ‘Amoriños’ no Festival Noroeste Estrella Galicia
O espectáculo de Xosé A. Touriñán e David Perdomo chega o vindeiro 9 de agosto ao Parque de Santa Margarida cunha función especial dentro da 39º edición do Festival Noroeste Estrella Galicia. As entradas xa están dispoñibles.