Así foi a presentación “dun espectáculo espectacular”

“Non sei se somos moi conscientes do que pode chegar a ser o espectáculo de Bibopalula”, dixo Gonzalo Castro, concelleiro de Cultura e Turismo do Concello da Coruña esta mañá, na presentación da nova produción de Ainé. A expectación era máxima despois dunha convocatoria a través das redes sociais no que Robin e Carpin, dous dos protagonistas da serie, avisaban dun “anuncio importante” para o mediodía deste sábado, e a noticia non decepcionou.

Preto dun cento de nenas e nenos encheron as cadeiras colocadas nos Xardíns de Méndez Núñez da Coruña para saber de primeira man de que se trataba, e Xosé A. Touriñán desvelouno: Bibopalula terá espectáculo teatral, e estrearase no Teatro Colón da Coruña o 7 de xuño.

O actor e produtor explicou ás familias o que poderán ver se deciden asistir a algunha das oito funcións previstas no mes de xuño en distintas localidades de Galicia: “un decorado espectacular, cancións espectaculares, unha iluminación espectacular… un espectáculo espectacular”, dixo. Unha proposta inédita no noso país ao apostar por un formato que case sempre traen produtoras de fóra e en castelán. “Imos demostrar que aquí tamén se pode facer, e que se pode facer en galego”.

Touriñán presentou xusto despois ao equipo da produción, encabezado por Marta Lado -autora do texto e directora-, Lidia Veiga -actriz protagonista-, Cristina Andrade, Graciela Carlos, Sara Ferro, Nerea Rodríguez -elenco-, Marita Martínez, Iria Lamas, Andrés Mahía, Xosé A. Touriñán, Marta Lado e Laura Mahía -voces-, Santi Jul e Iván Laxe -música-, Gonzalo Porteiro -deseño de iluminación-, Martina Cambeiro -vestiario e coreografías-, Laura Mahía -dirección de arte-, e Banale -escenografía-.

Pistas para atopar un misterioso tesouro

Marta Lado, directora do espectáculo, dirixiuse na presentación ás cativas e cativos para contarlles algúns detalles sobre o que poderán ver no escenario: “pistas, e a busca dun tesouro que non será doado atopar, porque haberá atrancos, será día, será noite, e todos os que veñan ao teatro vivirán unha aventura moi emocionante”.

Cultura en galego para as máis pequenas e pequenos

Tanto Pedro González, de Deleite, como Gonzalo Castro, concelleiro de Cultura e Turismo do Concello da Coruña, destacaron a importante de apoiar calquera iniciativa que promova a cultura en galego entre as máis cativas e cativos. “Imos estar sempre ao carón de iniciativas que promovan que as nosas e nenas e nenos poidan desfrutar de cultura na nosa lingua”, apuntou o responsable da marca, que adoita apoiar todo tipo de proxectos escénicos, audiovisuais e literarios infantís. Pola súa parte o concelleiro referiuse á “honra” que supón para A Coruña acoller a estrea desta proposta, “que está chamada a marcar un antes e un despois no panorama da produción escénica en Galicia”.

Jacobo Sutil, director da Axencia Galega das Industrias Culturais da Xunta de Galicia, anunciou o apoio ao proxecto con máis de 40.000 € no marco da convocatoria de axudas á creación escénica, e puxo en valor o traballo de Ainé á hora de levar aos escenarios propostas “ambiciosas e moi coidadas”.

Frautas e fotos con Robin

Ao remate da presentación, e despois de que Touriñán anunciara as datas da xira, Robin, acompañado por Deleitiña, repartiron entre as e os asistentes frautas e globos, citándose para o 7 de xuño, o día no que comezará a aventura de Bibopalula nos escenarios. As entrada xa están á venda.