‘Territorio Regueifa’ retoma o seu camiño no Culturgal e anuncia nova data de estrea
O stand da AGADIC no Culturgal converteuse nun espazo para descubrir o mundo da regueifa da man de Manolo Maseda, Josinho da Teixeira e Lupe Blanco. ‘Territorio Regueifa’ levou a maxia da tradición oral galega improvisada á Feira das Culturas Galegas e anunciou a nova data de estrea do espectáculo.
Equipo de 'Territorio Regueifa' e convidados no stand de Agadic durante o Culturgal. Fotografía: Aigi Boga
Territorio Regueifa tivo unha parada especial no Culturgal 2025, a Feira das Culturas Galegas. Os protagonistas, Manolo Maseda, Josinho da Teixeira e Lupe Blanco, acompañados por Xosé A. Touriñán como produtor, recibiron o público e explicaron a esencia desta proposta: mesturar historia, improvisación e participación nunha experiencia única.
Durante o encontro, os artistas tamén fixeron unha pequena mostra do que é a regueifa, provocando risas e admiración entre os e as asistentes. A cita serviu tamén para anunciar que a estrea de Territorio Regueifa terá lugar o 6 de febreiro, un novo inicio tras a cancelación da primeira data por motivos de saúde.
O encontro contou co acompañamento de representantes institucionais, como Jacobo Sutil, director da AGADIC, e Valentín García, secretario xeral de Política Lingüística da Xunta de Galicia, quenes destacaron o valor de iniciativas que combinan tradición, creación e divulgación cultural.
A obra, producida en colaboración co FIOT Carballo (Festival Internacional Outono de Teatro) e o Centro Dramático Galego, retoma así a súa viaxe, levando a maxia da improvisación oral a novos públicos e consolidando a regueifa como un patrimonio vivo, capaz de unir humor, emoción e coñecemento nun espectáculo participativo e festivo.
As entradas para a estrea de Territorio Regueifa estarán dispoñibles próximamente.
NOTICIAS RELACIONADAS
Lamatumbá, finalista nos XIII Premios Martín Códax da Música
A banda ourensá opta ao galardón na categoría de Orquestras, Grupos e Música de Verbena, reafirmando o seu lugar como un dos grandes referentes da festa e da música popular galega.
‘Amoriños’ chega a Cee e Vigo con cheos absolutos e suma novas funcións en Pontevedra e A Coruña
A xira de ‘Amoriños’, continúa esta fin de semana en Cee e Vigo, con case todas as entradas esgotadas. O espectáculo amplía ademais o seu percorrido con novas datas en Pontevedra e unha quinta función no peche da Coruña.
Xosé A. Touriñán súmase a ‘Chisteria Colectiva’, unha das grandes apostas do EMHU 2026
O humorista participa no espectáculo colectivo xunto a outros grandes nomes da comedia estatal, unha estrea absoluta no marco do encontro que xa colgou o cartel de entradas esgotadas para as súas dúas funcións en Palexco.