Bibopalula abre no Culturgal a nova xira do espectáculo
Bibopalula · O Espectáculo presenta no Culturgal a primeira parada da súa xira de inverno.
Un encontro para cantar, rir e acompañar á Banda do Bosque nunha aventura pensada para as máis pequenas e pequenos.
Unha das personaxes de Bibopalula, o Señor Moucho, durante unha función. Fotografía: Aigi Boga
Bibopalula · O Espectáculo chega este domingo ao Culturgal 2025 para converter este domingo, 30 de novembro, nun encontro cheo de música, fantasía e natureza. Esta función marcará o inicio dunha nova andaina para esta proposta, que levará á Banda do Bosque por diferentes cidades galegas durante os meses de inverno. A cita será ás 12.00 no Pazo da Cultura de Pontevedra, e promete deslumbrar á cativada de entre 2 e 6 anos.
Tras o éxito da súa primeira tempada, Ava e os seus amigos Robin, Carpin, Pegui e Merli regresan aos escenarios con esta obra, musical e teatral, que combina humor, tenrura e unha estética moi coidada. Cunha misión encomendada polo Señor Moucho, a Banda do Bosque convidará ao público a seguir os seus pasos á procura dun misterioso tesouro, explorando os segredos da natureza e os fenómenos que transforman o bosque.
Con dirección e texto de Marta Lado, e a interpretación de Lidia Veiga, Cristina Andrade, Graciela Carlos, Sara Ferro e Nerea Rodríguez, o espectáculo continúa a estender o universo creado por Undodez e a Televisión de Galicia. As doce cancións orixinais, xa recoñecibles para as familias que seguen a serie, constrúen unha experiencia inmersiva onde a música impulsa cada aventura.
A función do Culturgal dá así o pistoletazo de saída a unha nova xira que continuará por Vilagarcía, A Coruña e Vigo durante o inverno. Unha oportunidade para achegarse en directo a un dos proxectos escénicos familiares máis destacados do panorama galego.
As entradas están dispoñibles a través da web do espectáculo, bibopalula.gal.
NOTICIAS RELACIONADAS
‘A Lacena Pequena’ chega a Triacastela cunha programación arredor do patrimonio e a natureza
A programación inclúe unha exposición de Ana Carballo, unha conferencia do antropólogo Rafael Quintía, unha degustación de produtos locais e actuacións de danza e música tradicional.
‘Territorio Regueifa’ chega hoxe ao Val do Ubra cunha función de balde
O Auditorio Municipal acolle ás 20.30 h unha nova representación do espectáculo, protagonizado por Lupe Blanco, Manolo Maseda e Josinho da Teixeira. A xira continuará en novembro con dúas citas en Barakaldo e Ames.
A Lacena Pequena chega á Rúa cunha xornada arredor da memoria, as festas e o viño
A programación do 3 de outubro percorrerá a historia das celebracións da localidade, a tradición vitivinícola de Valdeorras e a música popular. A xornada contará con conversas, poesía, unha cata de viños e cantos de taberna.