‘Amoriños’ encadea cinco funcións esta fin de semana en Vilagarcía e Santiago

A xira de Amoriños, o espectáculo de Xosé A. Touriñán e David Perdomo, continúa avanzando con forza polo país, conectando co público en cada parada e enchendo auditorios ao pouco de saír á venda. Despois da súa estrea en Noia e da posterior parada en Vigo, o espectáculo encara unha das súas fins de semana máis intensas, con tres funcións en dous concellos diferentes.

Os días 12 e 13 de decembro, Amoriños recalará en Vilagarcía de Arousa, onde o Auditorio Municipal acollerá tres funcións. O domingo 14 será a quenda de Santiago de Compostela, con dúas sesións consecutivas no Auditorio de Galicia. Todas as entradas para estes pases están esgotadas.

Un espectáculo de encontros imposibles

Con Amoriños, Touriñán e Perdomo retoman a súa química escénica para mergullarse no territorio máis perigoso de todos: o amor. O espectáculo propón un desfile de citas tolas, paixóns imposibles e personaxes que nunca deberían xuntarse… pero fano igual. Un ‘First Dates’ á galega, con humor salvaxe, improvisación e ese toque emocional que converte cada pase nun encontro único co público.

Os dous artistas asinan tanto os textos como a dirección, acompañados polo asesoramento de Noemí Rodríguez e a produción de Laura Canto. O equipo técnico habitual das producións de Ainé completa unha proposta escénica coidada, dinámica e pensada para que cada función sexa diferente á anterior.

Amoriños continúa así unha xira marcada pola complicidade co público, que está a responder con entusiasmo en cada parada. Unha fin de semana máis para deixar que o humor faga o seu traballo sobre o escenario.