‘Somos Criminais e punto final’ aterra en Vilagarcía na recta final da súa xira
A derradeira xira de Somos Criminais e punto final chega este sábado a Vilagarcía con dúas funcións no Auditorio Municipal (ás 18.00 e ás 20.30) e entradas case esgotadas para ambas. Con estas citas, o proxecto encara a súa recta final.
Carlos Blanco e Xosé A. Touriñán nunha función de 'Somos Criminais e punto final'
A terceira e última entrega dunha das propostas máis exitosas do teatro galego chega esta fin de semana a Vilagarcía de Arousa. O Auditorio Municipal acollerá este sábado, 25 de outubro, dúas funcións de Somos Criminais e punto final, ás 18.00 e ás 20.30 horas, con entradas practicamente esgotadas.
Dirixido por Tito Asorey, con dramaturxia de José L. Prieto, Carlos Blanco e Xosé A. Touriñán, o espectáculo pon o broche final á triloxía teatral máis exitosa do teatro galego recente. Tras pasar por Santiago, Narón e Vigo, a xira entra na súa recta final: Vilagarcía será unha das últimas ocasións para desfrutar en directo desta proposta, antes da despedida definitiva o 1 de novembro na Coruña, onde o proxecto porá punto final ante o público galego.
Nesta derradeira entrega, os dous cómicos sitúan ao público nunha Galicia ao bordo do fin do mundo. A bordo da nave Arteixo II, exercen de capitáns dunha misión que debe evacuar a un grupo de elixidos cara a un novo planeta, levando consigo todo aquilo que define a identidade galega: o humor, a retranca e a memoria.
Somos Criminais e punto final suma así un novo éxito de público e confirma o seu lugar como un dos fenómenos teatrais máis destacados da última década en Galicia.
As entradas están dispoñibles a través da web do espectáculo www.somoscriminais.gal.
NOTICIAS RELACIONADAS
Lamatumbá, finalista nos XIII Premios Martín Códax da Música
A banda ourensá opta ao galardón na categoría de Orquestras, Grupos e Música de Verbena, reafirmando o seu lugar como un dos grandes referentes da festa e da música popular galega.
‘Amoriños’ chega a Cee e Vigo con cheos absolutos e suma novas funcións en Pontevedra e A Coruña
A xira de ‘Amoriños’, continúa esta fin de semana en Cee e Vigo, con case todas as entradas esgotadas. O espectáculo amplía ademais o seu percorrido con novas datas en Pontevedra e unha quinta función no peche da Coruña.
Xosé A. Touriñán súmase a ‘Chisteria Colectiva’, unha das grandes apostas do EMHU 2026
O humorista participa no espectáculo colectivo xunto a outros grandes nomes da comedia estatal, unha estrea absoluta no marco do encontro que xa colgou o cartel de entradas esgotadas para as súas dúas funcións en Palexco.