‘Continente María’ estivo no Auditorio Municipal de Vigo e ‘Recortes’ no Teatro Afundación. Ambas obras continúan de xira por Galicia tras a pasada fin de semana de intensa actividade.

Isabel Garrido fronte aos seus compañeiros de equipo, Sergio Zearreta, Manuel Cortés, Touriñán, Christian Escuredo e Xoán Fórneas, nunha escena de ‘Recortes’. Foto: Aigi Boga

A Vigo chegaron a pasada fin de semana Recortes, caneos e outras formas de driblar e Contiente María: dúas producións que ofreceron nesta cidade cinco pases en apenas tres días. Esta ampla oferta teatral ten unha característica moi relevante que é a heteroxeneidade dos espectáculos, que se insiren en mundos moi diferentes.

O público vigués puido entrar a través do Teatro Afundación no mundo do fútbol profesional, con Recortes, e descubrir as historias máis escuras que se veñen dando nel. Pero tamén puideron ir ao Auditorio Municipal para facer unha viaxe polo Continente María e deste xeito coñecer a figura de María Casares, a gran actriz galega. Deste xeito se demostra que sobre os escenarios todo ten cabida e no patio de butacas hai un oco para cada persoa. As dúas obras están dirixidas por Tito Asorey e en ambas a música de Vadim Yukhnevich xoga un papel fundamental.

Tras a fin de semana de intensa actividade en Vigo, Recortes e Continente María seguirán xirando por Galicia. Por Narón, Pontevedra, Cangas, Burela, Lugo, Vilagarcía, A Coruña e Ferrol pasará a obra con máis fútbol dos teatros, baseada na última investigación de Nacho Carretero, para a cal xa se poden adquirir as entradas na web de Recortes. Para Continente María tamén hai datas confirmadas en Viveiro e Ourense, cuxo horario se pode consultar na web do espectáculo, así como adquirir as entradas.

Melania Cruz como María Casares en ‘Continente María’. Foto: Aigi Boga