Novas datas de ‘Continente María’

Melania Cruz ponse nos zapatos de María Casares e continúa levando á gran actriz a través deste espectáculo pola xeografía galega. A obra, dirixida por Tito Asorey, estreouse o pasado maio e comezou unha xira que a levará por toda Galicia

En maio do pasado 2022, centenario de María Casares, estreábase na Coruña Continente María, unha homenaxe á singular actriz que sempre levou con ela os seus ideais progresistas e republicanos, un repaso pola súa vida e un diálogo co seu pensamento que establece a protagonista, Melania Cruz. Este ano haberá novas oportunidades para ver a obra pois, polo de agora, xa hai cinco novas datas confirmadas.

En xaneiro Continenete María estará en Carballo, o día venres 27, e en Cedeira o sábado 28. O 24 de marzo estará en Bertamiráns e o 25 dese mesmo mes, en Noia. En abril tamén haberá un pase, o venres 20 en Pontevedra. Toda a información sobre o espectáculo, o calendario e a venda de entradas están dispoñibles en continentemaria.gal.

Esta homenaxe sobre as táboas, dirixida por Tito Asorey e coa música de Vadim Yukhnevich, vén recibindo ao seu paso unha chea de boas críticas, tanto dende os aplausos e opinións en redes sociais do público como dende a prensa. Tras a súa estrea na cidade natal de María Casares, o espectáculo permaneceu unha semana no Salón Teatro de Santiago para despois viaxar por moitas localidades galegas como Lugo, Arteixo, Oleiros, Vigo ou Ourense. Ademais, Continente María chogou ata París, a cidade do exilio sobre cuxos escenarios naceu María Casares como artista. Representouse esta peza no Instituto Cervantes da capital francesa no marco da homenaxe a María Casares programada pola Embaixada Española en Francia.

Un pequeno adianto

Nas próximas semanas anunciaremos novas datas para esta primeira parte do ano na que María Casares seguirá regresando ás táboas na pel de Melania Cruz.