‘Continente María’ emociona na súa estrea no Teatro Rosalía de Castro

Melania Cruz e Vadim Yukhnevich arrincaron o aplauso do público coruñés coa súa impecable actuación ata en dúas ocasións antes de rematar a función. O espectáculo dirixido por Tito Asorey colleitou grandes críticas por parte dos asistentes.

---

O Teatro Rosalía de Castro acolleu a estrea de Continente María, obra na que Melania Cruz interpreta a María Casares, mais non só iso. O texto elaborado pola uruguaia Marianella Morena procuraba un diálogo que trouxese á actriz galega ao presente, o cal se traduciu nunha infinidade de rexistros, acentos e situacións polas que Melania transitou como se fosen a súa propia casa, a súa propia pel. A música de Vadim Yukhnevich creou un espazo no que a emoción e o dinamismo conviviron coa reflexión sobre o amor, a guerra ou a identidade.

A do luns 16 foi unha noite especial na que por fin chegaba ao público un espectáculo no que o director Tito Asorey e Melania Cruz levaban anos traballando. A unión de forzas de Ainé con A Quinta do Cuadrante, o Concello da Coruña e o Centro Dramático Galego fixo posible esta montaxe que levantou ata en dúas ocasións ao público das butacas antes do remate da obra e finalizou cunha ovación de case tres minutos.

Continente María mostrouse como un espazo de memoria democrática, de reivindicación da figura dunha actriz inmensa e de demostración da forza do teatro galego. O cheo acolledor e absoluto que se viu no Teatro Rosalía de Castro, dá conta do interese e do compromiso social con iniciativas tan importantes coma esta que celebra unha actriz que fixo do teatro a súa patria, no ano no que se celebra o centenario do seu nacemento.

María Casares regresa á Coruña

O espectáculo presentouse no pazo de María Pita, sede do Concello da Coruña, nun acto que contou coa presenza da alcaldesa Inés Rey, o director do Centro Dramático Galego, Fran Núñez; o director do Teatro Rosalía de Castro, Paulo Rodríguez; Xosé A. Touriñán, produtor da obra; Tito Asorey, director de Continente María e Melania Cruz, protagonista.

Nesta presentación pública, tanto a alcaldesa como o director do CDG resaltaron a necesidade de poñer en escena un gran espectáculo sobre a actriz coruñesa, enmarcándoo nos diferentes actos do centenario que se cumpre neste ano.

Tito Asorey destacou a musicalidade e a posta en escena do espectáculo mentres que Melania Cruz mostrouse moi feliz por poder levar a escena un proxecto tan esperado. Pola súa banda, Xosé A. Touriñán animou ao público Coruñés a achegarse ao teatro e gozar cun espectáculo que pretende non só achegar a figura de María Casares, senón contaxiar a súa paixón polas táboas.

Estancia no Salón Teatro de Santiago

Continente María estará na carteleira do Salón Teatro compostelán desde o día 19 ata o 29 de maio. Así o anunciaron no propio teatro Fran Núñez e o Secretario Xeral de Cultura da Xunta de Galicia, Anxo Lorenzo. Sobre o escenario da sede do CDG, o seu director destacou a calidade do espectáculo e a necesidade de levar o teatro a todas as vilas e cidades galegas. Anxo Lorenzo, pola súa banda, destacou a colaboración entre institucións para a produción da obra.

Tito Asorey quixo agradecer ao Concello de Rianxo a súa colaboración para a residencia técnica de Continente María e reivindicou os teatros non só como lugares de exhibición senón de creación. Melania Cruz e Vadim Yukhnevich abrirán o xoves 19 esta estancia no Salón Teatro para a que as entradas xa están dispoñibles en continentemaria.aine.gal na web de Ataquilla.