‘Amoriños’ retoma a súa xira con cheos absolutos e novas datas
A xira de 'Amoriños' volve coller impulso esta semana cunha nova parada en Ponteareas. O espectáculo continúa confirmando o seu éxito cunha resposta do público que se traduce en cheos absolutos e novas funcións engadidas ao percorrido.
David Perdomo e Xosé A. Touriñán durante unha función de 'Amoriños'. Fotografía: Aigi Boga.
Este venres 10 de abril, Amoriños volve subir ao escenario en Ponteareas con dúas funcións no Auditorio Municipal Reveriano Soutullo, unha ás 20.30 e outra ás 23.00. E faino co mellor dos sinais posibles: co cartel de completo nos dous pases. Un comezo de tramo que deixa claro que, cando chega a primavera… hai ganas de risa, de encontros e de deixarse levar por esas historias de amor un pouco caóticas que só poden pasar con Touriñán e Perdomo sobre as táboas.
A resposta do público repítese tamén noutras paradas do percorrido. As funcións previstas en Verín e Cee están igualmente esgotadas, consolidando unha tendencia que vén acompañando á proposta desde o seu inicio: auditorios cheos e unha conexión directa co público en cada encontro.
A xira continúa nas próximas semanas cun percorrido que atravesa Galicia de norte a sur: Verín (17 de abril), Lugo (18 de abril), Ribadeo (30 de abril), Vilalba (1 de maio), Cee (8 de maio), Vigo (9 e 10 de maio), Narón (16 de maio), Ourense (22 de maio), Pontevedra (30 e 31 de maio)… ata chegar á Coruña, onde terá lugar o gran peche no Teatro Colón os días 5, 6 e 7 de xuño.
Ademais, o camiño segue medrando. En Vigo e Pontevedra abríronse novas funcións, ampliando así as oportunidades para quen non quere quedar sen o seu oco no espectáculo de Amoriños esta primavera. Cun formato que mestura comedia, improvisación e participación do público, as funcións constrúense en directo, convertendo cada pase nun encontro único e irrepetible.
Nesta segunda xira, o Touriñán e Perdomo reafirman o seu carácter enriba do escenario e a súa capacidade para conectar co público a través do humor, a emoción e as historias inesperadas que nacen no momento (querendo ou sen querelo).
As entradas para o resto da xira están dispoñibles a través da web do espectáculo amorinos.info.
NOTICIAS RELACIONADAS
Xosé A. Touriñán presenta ‘Moi Animal’, o seu novo monólogo
O humorista estrea unha nova proposta escénica arredor da nosa relación cos animais e das contradicións da especie humana. A xira comezará en outubro e percorrerá once localidades galegas.
A Coruña acolle a programación do Noroestiño, a proposta familiar do 39º Festival Noroeste Estrella Galicia
A programación infantil do Festival Noroeste Estrella Galicia volverá aos Xardíns de Méndez Núñez do 5 ao 9 de agosto con sete propostas de música e artes escénicas para público familiar.
Xa á venda as entradas para a función especial de ‘Amoriños’ no Festival Noroeste Estrella Galicia
O espectáculo de Xosé A. Touriñán e David Perdomo chega o vindeiro 9 de agosto ao Parque de Santa Margarida cunha función especial dentro da 39º edición do Festival Noroeste Estrella Galicia. As entradas xa están dispoñibles.