Amoriños

Despois de petar auditorios con Corentena e Corentena · Game Over, Perdomo e Touriñán regresan aos escenarios coa súa parella máis perigosa: o amor. En Amoriños, os dous intérpretes mergúllanse no territorio máis imprevisible das relacións humanas para poñer enriba da mesa citas imposibles, paixóns desatadas e personaxes que, por lóxica, nunca deberían atoparse… pero acaban facéndoo igualmente.

O espectáculo constrúese como un First Dates á galega, no que o humor salvaxe convive coa emoción e coa improvisación. En cada encontro aparecen as contradicións, as expectativas, os medos e os desexos que atravesan o amor en todas as súas formas: o romántico, o ridículo, o incómodo, o que doe e o que fai rir de nós mesmos.

Fieles ao seu estilo, Perdomo e Touriñán xogan coa complicidade do público, facendo de cada función unha experiencia viva e distinta, onde a risa funciona como punto de encontro e o corazón aparece cando menos se espera. Amoriños é unha comedia sobre quererse como se pode, unha celebración do absurdo das relacións humanas con personaxes de todo tipo, na que o humor serve tamén para falar, sen filtros, da emoción máis recoñecible e universal.