‘Amoriños’ chega aos escenarios da man de Touriñán e Perdomo
Tras o éxito de 'Corentena' e 'Corentena · Game Over', Xosé A. Touriñán e David Perdomo regresan ás táboas con Amoriños, un espectáculo cheo de humor, improvisación e emoción, no que exploran o sentimento máis perigoso de todos: o amor.
Póster do espectáculo 'Amoriños'. Deseño de Noa Fernández.
Unha nova aventura está a piques de comezar sobre as táboas dos teatros galegos. Xosé A. Touriñán e David Perdomo poñen en marcha a súa nova proposta escénica: Amoriños. O dúo retoma a súa xa clásica complicidade e improvisación, agora centrados no tema máis universal e perigoso de todos: o amor.
Despois do éxito deste dúo en Corentena e Corentena · Game Over, Touriñán e Perdomo reencóntranse cun espectáculo sobre citas tolas, paixóns imposibles e encontros que non deberían suceder… pero suceden igual. Un First Dates á galega, con humor salvaxe, moito corazón e esa química inconfundible que caracteriza á parella artística.
Amoriños conta con textos orixinais e dirección dos propios protagonistas, co asesoramento de dirección de Noemí Rodríguez e dirección de produción de Laura Canto. O deseño de iluminación é de Gonzalo Porteiro, e o proxecto complétase cun equipo técnico e artístico habitual nas producións de Ainé, garantindo unha posta en escena coidada e chea de ritmo.
O lanzamento desta nova proposta marca o inicio dunha intensa tempada outonal, cunha xira que percorrerá diferentes puntos do país. O pistoletazo de saída será o 21 de novembro en Noia, e continuará ata finais de ano con paradas en Vigo (23 de novembro), Vilagarcía de Arousa (13 de decembro), Santiago de Compostela (14 de decembro) e A Coruña (27 de decembro).
Os cupidos do teatro, Touriñán e Perdomo, estrean con Amoriños unha nova etapa sobre as táboas, onde cada historia, cada encontro e cada personaxe conxugan o absurdo e a emoción nunha comedia sobre o que nos une (ou nos separa): o amor.
As entradas para estas funcións están dispoñibles a través da web oficial do espectáculo: www.amorinos.info
NOTICIAS RELACIONADAS
Touriñán celebra o día dos namorados cunha función do seu monólogo en Madrid
Este sábado, Xosé A. Touriñán regresa ao Teatro Arlequín de Madrid cunha nova función do seu monólogo, dentro dunha xira estatal que percorrerá distintas cidades máis alá das nosas fronteiras.
Monólogo de Xosé A. Touriñán
Un monólogo que viaxará por todo o Estado, no que Xosé A. Touriñán mestura humor e experiencia vital para conectar co público desde a proximidade.
‘Territorio Regueifa’ presentouse onte en Carballo como un soño que chega ao escenario
A estrea absoluta de ‘Territorio Regueifa’, este venres 6 de febreiro no Pazo da Cultura de Carballo, foi presentada nunha rolda de prensa que puxo o foco na importancia de levar a regueifa ao teatro e de reivindicala como arte viva.