Estreamos ‘O último home’, de Manuel Cortés

Rematamos moi contentos o 2024 pero xa estamos coa mente no 2025. Comezaremos o novo ano do mesmo xeito que acabamos o vello: nos teatros! Pasadas as festas, co comezo “real” do ano, a Sala Ártika de Vigo será o escenario no que estrearemos a nosa primeira produción do ano os días 11 e 12 de xaneiro. O último home é unha comedia poética, como lle gusta dicir ao seu creador, o actor, dramaturgo e guionista Manuel Cortés. En escena, Cortés estará acompañado pola dj e produtora Russ, quen xa traballaron xuntos en Códice K. A dirección é de Borja Fernández e o espazo escénico é obra de Carlos Alonso.

O último home sitúanos na extinción da humanidade. Unha soa persoa queda para facer balance do que fixemos —ou non fixemos— e como tendo todo a favor para gozar da nosa existencia no mundo, conseguimos levalo ao colapso. A pesar desta temática, o espectáculo fálanos desde a comedia e desde a poesía, armas útiles para sobrelevar as grandes catástrofes e, nesta obra, estamos diante da maior catástrofe posible.

Este novo proxecto de Ainé con Manuel Cortés conta coa axuda da Agadic a través do seu programa de Subvencións á Creación Escénica para a súa produción. Logo da súa estrea en Vigo, O último home sairá de xira por Galicia nos próximos meses.

Que é O último home?

O último home é unha comedia teatral a modo de recital poético. E viceversa. Sendo precisos, unha comedia poética. Un artefacto cómico-poético-teatral para un home actor/rapsoda e unha muller DJ/ambientadora sonora, sobre a idea da extinción da especie humana.

O último home expón, desde a evidencia, o feito de que unha soa persoa sobreviva ao resto. Sen traumas. Sen alarmas. E con humor, por suposto. Porque non deixa de ser cómico que tendo todo a favor para gozar do mundo, o vaiamos destruír sen reparar en que nós formamos parte del.