Unha ponte teatral con ‘Corentena’ e ‘Aquí Tou!’

Outubro está sendo inusualmente caloroso, mais a programación teatral segue ofrecendo, como vén sendo habitual, un lote de ofertas nas cidades e vilas galegas. Esta semana da primeira ponte do outono, David Perdomo e Xosé A. Touriñán levan a súa ‘Corentena‘ a Ourense e Lugo e o sábado, Touriñán xoga na casa presentando ‘Aquí Tou!‘ no Teatro Colón.

‘Corentena‘ arricaba a súa xira polos teatros galegos esta pasada fin de semana con dúas funcións cheas no Auditorio Sede Afundación de Pontevedra. Agora viaxa ao interior facendo parada o xoves 12 no Auditorio Municipal de Ourense con dúas funcións programadas, ás 17.30 e ás 20.00 horas. Ao día seguinte, os dous cómicos visitan o Gustavo Freire de Lugo con outras dúas funcións, ás 20.30 e ás 23.00 horas.

O sábado, o Teatro Colón acolle a primeira función de ‘Aquí Tou!‘ na Coruña. O monólogo de Touriñán percorreu diferentes vilas e cidades galegas pero ata o de agora nunca fixera parada na casa. As dúas sesións programadas no teatro coruñés esgotaron as entradas en menos de 3 días, polo que Touriñán repetirá na Coruña no mes de novembro, desa volta no Auditorio de Palexco.

Un mes de outubro moi intenso

A semana seguinte, os dous espectáculos continuarán as súas xiras, cunha dobre función de ‘Corentena’ o día 20 en Vilagarcía de Arousa e dous novos pases de ‘Aquí Tou!’ en Vigo, no Teatro Afundación. As entradas están á venda en corentena.gal e aquitou.gal respectivamente.

Pola súa banda, ‘Continente María‘ fará parada o sábado 14 en Soria antes de partir cara Colombia para participar nos festivais de Manizales e San Ignacio e ‘Códice K‘ estará día 20 nunha nova edición do Outono Teatral de Carral.