Nacho Carretero e José L. Prieto contan como se adaptou ‘Fariña’ para o teatro

O autor do exitoso ensaio sobre o narcotráfico en Galicia nas últimas décadas do pasado século, e o dramaturgo encargado da súa adaptación ao teatro, conversarán este martes ás 18.00 na conta de Instagram da Fnac.

“Fariña: do relato xornalístico á obra de teatro”. É o título da conversa que a Fnac organiza para este martes, a través da rede social Instagram, dentro da programación do Live Fórum Fnac. Son unha serie de encontros relacionados co teatro, a música ou a literatura que periodicamente pon en marcha a tenda de tecnoloxía e cultura nas súas canles dixitais.

Nacho Carretero, autor de Fariña, e José L. Prieto, responsable da adaptación da obra orixinal ao teatro, conversarán co público sobre cuestións como o xeito de trasladar trescentas páxinas dun libro a cen minutos dun espectáculo teatral, o emprego do galego na versión do espectáculo teatral en castelán, ou os xéneros que se empregan na obra (afondando, por exemplo, no camiño do humor ao drama que adoitan destacar os espectadores que asisten ao teatro).

Carretero e Prieto responderán ademais ás preguntas dos seguidores da Fnac en Instagram que decidan unirse ao directo, que durará ao redor dunha hora, e que forma parte das accións promocionais relacionadas coa exhibición do espectáculo teatral no Teatro Cofidís Alcázar, cada fin de semana desde o pasado mes de decembro.