‘Fariña’ chega esta fin de semana a Barcelona

O espectáculo rematará a temporada na capital catalá logo do seu exitoso paso por Madrid, onde acumulou máis de 26.000 espectadores nas funcións que tiveron lugar nas Naves del Español e no Teatro Cofidis Alcázar.

Fariña no Teatre Tívoli

Logo de case seis meses en Madrid, Fariña estará esta fin de semana en Barcelona para rematar a temporada. O Teatre Tívoli acollerá tres únicas funcións do 21 ao 23 de maio da adaptación ao teatro do libro de Nacho Carretero.

O elenco de actores dirixidos por Tito Asorey levará á capital catalá a historia do narcotráfico en Galicia desde a última década dos anos oitenta. Unha ollada única sobre a nosa historia a través dun espectáculo vibrante que atrapa ao espectador desde o primeiro momento. Case todos os estados de ánimo teñen cabida nesta obra. Os acontecementos e os personaxes sucédense a grande velocidade, pasando da euforia aos remorsos e da comedia ao drama. Unha posta en escea que invita ao espectador á festa, pero tamén á reflexión sobre a historia recente do noso país, do que fomos e do que seguimos sendo.

As entradas están á venda na web www.grupbalana.com.

Un espectáculo que acumula 46.000 espectadores

Ás máis de 20.000 persoas que pasaron polos teatros galegos na primeira xira do espectáculo, entre novembro do 2019 e xaneiro do 2020, engadíronse logo preto de 6.000 espectadores entre setembro e outubro, nas Naves del Español, e ao redor de 20.000 nas funcións do Teatro Alcázar de Madrid que remataron este mes de maio.

A obra producida por Nacho Carretero e Xosé A. Touriñán é unha das producións teatrais galegas máis exitosas da última década. O recoñecemento por parte crítica, público e medios de comunicación está facendo que, a pesar das limitacións na capacidade dos teatros para acoller público, Fariña siga esgotando as entradas en case todas as funcións e continúe colleitando grandes críticas na prensa e na crítica especializada.