Estreamos ‘Somos Criminais e punto final’
Coas entradas esgotadas, o Auditorio de Galicia acolle as tres primeiras funcións da xira de presentación do espectáculo que pon punto e final a un dos proxectos máis exitosos do teatro galego. Os dous cómicos pasarán logo por Vilagarcía, Cangas, Ourense, Lugo, Burela, Vigo, A Coruña, Pontevedra e Narón.
Blanco e Touriñán son nesta ocasión os capitáns da nave Arteixo II. Foto: Aigi Boga
Falta pouco máis dunha hora para a fin do mundo. En Galicia, unha nave, a Arteixo II, está a piques de despegar cuns poucos elixidos a bordo en dirección a un planeta onde empezarán unha nova vida. Os capitáns da nave, Carlos Blanco e Touriñán, son os encargados de que a evacuación se leve a cabo con éxito e de meter nesta Arca de Noé galega todo o noso patrimonio humano, material e inmaterial máis prezado, para que a nova terra á que emigraremos siga sendo criminal.
Esta é a premisa do espectáculo co que Carlos Blanco e Xosé A. Touriñán poñen o punto e final a un dos proxectos máis exitosos do teatro galego nas últimas décadas. Dirixido por Tito Asorey con textos de José L. Prieto, Carlos Blanco e Touriñán, Somos Criminais e punto final comeza este venres, 1 de novembro, a súa xira de presentación por toda Galicia. Logo do éxito de Somos Criminais e Somos Criminais 3, os dous cómicos volven subir xuntos aos escenarios para explorar o noso xeito especial de ser e estar no mundo, mediante un humor e complicidade marca da casa que conseguiu levar máis de 100.000 espectadores aos teatros galegos.
O gran éxito entre o público das anteriores entregas de Somos Criminais semella ter continuidade con Somos Criminais e punto final, vendendo máis de 17.000 entradas nestas primeiras semanas. O espectáculo, producido por Ainé e Condetrespés, estará de xira ata o mes de xaneiro. As entradas están á venda en somoscriminais.gal e na plataforma Ataquilla.
Consulta todas as datas
NOTICIAS RELACIONADAS
Unha nova etapa para ‘Territorio Regueifa’
O espectáculo de Lupe Blanco, Manolo Maseda e Josinho da Teixeira ofrecerá tres funcións durante esta fin de semana en Barakaldo e Laudio. Será a primeira vez que a proposta saia de Galicia desde a súa estrea en febreiro.
Zaragoza, a próxima parada do humor de Touriñán
O humorista actuará este sábado no Teatro de las Esquinas, nun percorrido que o levará de novo a Madrid en novembro. A xira continuará en 2027 con novas funcións en Madrid, Valencia, Santander e León.
A xira de ‘Moi Animal’ continúa colgando o cartel de esgotado
A nova proposta de Xosé A. Touriñán estará este venres 30 de outubro no Auditorio Municipal de Ourense, con dous pases, ás 20.30 e ás 23.00 h. A resposta do público continúa acompañando a xira, que xa ten varias funcións completas nas próximas semanas.