Ainé recibe a insignia de Empresa con Alma outorgada por Ecos do Sur

Ainé acaba de ser recoñecida pola ONGD galega Ecos do Sur co seu distintivo de Empresa con Alma, unha honra que premia o noso compromiso coa comunidade e a integración social. Este recoñecemento é un reflexo dos nosos valores fundamentais e a importancia de aliñar o noso labor artístico co compromiso social. Ainé aposta pola cultura como forma de cohesión social e territorial, así como polo respecto á diversidade.

Ecos do Sur traballa incansablemente desde 1991 para conectar os talentos das persoas máis vulnerables coas necesidades da comunidade, impulsando un país máis próspero, xusto e diverso. A través das súas iniciativas facilitan a igualdade xurídica, vivenda, saúde e oportunidades laborais a quen máis o necesitan, incluíndo migrantes, persoas en situación de desemprego e mulleres en especial vulnerabilidade.

O noso compromiso con Ecos do Sur non é novo. Xa na oitava edición do noso festival Castelo Conta en 2023, colaboramos activamente con eles a través da venda da Camisola Solidaria, cuxo beneficio foi destinado integramente aos seus proxectos de integración e desenvolvemento. Ademais, a ONGD estivo presente na última edición, compartindo información sobre os seus programas e liderando un taller sobre arte e sustentabilidade. Tamén presentaron o seu proxecto estrela, Habita Rural, que busca combater o despoboamento rural mediante a integración multicultural.

Este recoñecemento reforza a nosa convicción de que a cultura é un motor de cambio e que, unindo forzas con organizacións como Ecos do Sur, podemos contribuír activamente a unha sociedade máis inclusiva e solidaria. Estamos orgullosos de formar parte desta iniciativa e de seguir avanzando no noso compromiso de poñer a arte e a creatividade ao servizo do benestar colectivo.