‘Aquí Tou!’ despide a xira de outono en Ribeira
Despois de meses percorrendo Galicia e de sumar función tras función con auditorios cheos, 'Aquí Tou!' chega ao seu remate definitivo. Ribeira acolle este venres as dúas últimas representacións dun espectáculo que pecha así unha etapa moi especial sobre os escenarios.
Xosé A. Touriñán durante unha función de 'Aquí Tou!'. Fotografía: Aigi Boga
Aquí Tou! chega este venres 26 de decembro ao final da súa xira de outono. O Auditorio Municipal de Ribeira será o escenario das dúas últimas representacións do monólogo de Xosé A. Touriñán, programadas ás 20.30 e ás 23.00, ambas coas localidades esgotadas.
Durante esta xira de outono, iniciada en novembro, Aquí Tou! percorreu diversos escenarios galegos, con funcións en Ribadumia, A Estrada, A Rúa, Vimianzo, Rianxo, Salceda de Caselas e, finalmente, Ribeira. Desde a súa estrea, reuniu a milleiros de espectadores en teatros e auditorios de todo o país, sumando máis de trinta paradas grazas a esta última fase. A xira destacou pola frecuente ampliación de funcións e pola rapidez coa que se esgotaban as entradas, consolidándose como un percorrido marcado pola continuidade e a fidelidade do público.
Nesta proposta, Xosé A. Touriñán percorre con humor e tenrura os momentos máis significativos da súa vida, mesturando realidade e ficción, lembranzas persoais e referencias á cultura popular galega. Xunto a José L. Prieto na escritura, o monólogo constrúe un relato próximo e recoñecible, no que o humor convive coa emoción e permite que as persoas asistentes participen desde a identificación e a complicidade.
O espectáculo consolidouse como unha proposta sólida no panorama do humor galego, mantendo un vínculo constante co público e convertendo cada función nun espazo único de humor e emoción. A despedida en Ribeira pecha este percorrido de Aquí Tou!, deixando atrás unha xira marcada pola resposta entusiasta das espectadoras e espectadores.
NOTICIAS RELACIONADAS
‘A Lacena Pequena’ chega a Triacastela cunha programación arredor do patrimonio e a natureza
A programación inclúe unha exposición de Ana Carballo, unha conferencia do antropólogo Rafael Quintía, unha degustación de produtos locais e actuacións de danza e música tradicional.
‘Territorio Regueifa’ chega hoxe ao Val do Ubra cunha función de balde
O Auditorio Municipal acolle ás 20.30 h unha nova representación do espectáculo, protagonizado por Lupe Blanco, Manolo Maseda e Josinho da Teixeira. A xira continuará en novembro con dúas citas en Barakaldo e Ames.
A Lacena Pequena chega á Rúa cunha xornada arredor da memoria, as festas e o viño
A programación do 3 de outubro percorrerá a historia das celebracións da localidade, a tradición vitivinícola de Valdeorras e a música popular. A xornada contará con conversas, poesía, unha cata de viños e cantos de taberna.