Touriñán comeza a xira de ‘Moi Animal’ este venres en Cee
Despois de cinco anos, o humorista presenta un novo texto escrito xunto a José L. Prieto e JJ Vaquero. Unha proposta que parte da relación cos animais para retratar, en clave de humor, as contradicións da especie humana.
Xosé A. Touriñán na presentación de 'Moi Animal'. Fotografía: Aigi Boga.
Este venres comeza en Cee a xira de Moi Animal, o novo monólogo de Xosé A. Touriñán, que inicia o seu percorrido polos escenarios galegos cunha primeira fin de semana que xa ten case todas as entradas esgotadas. A Casa da Cultura de Cee será o lugar que acolla o debut do espectáculo, que viaxará despois ata o Auditorio Sede Afundación de Pontevedra o resto da fin de semana.
Moi Animal marca o inicio dunha nova etapa na traxectoria escénica de Touriñán. Despois de cinco anos con Aquí Tou!, o humorista presenta un novo texto no que volve situar o público no centro da experiencia teatral, desta vez cunha proposta arredor da relación que mantemos cos animais e das contradicións que atravesan a nosa maneira de convivir con eles.
O texto está asinado por Xosé A. Touriñán, José L. Prieto e JJ Vaquero, e mantén o humor e a observación do cotián como punto de partida para construír un novo universo escénico arredor das nosas propias contradicións.
Tras a súa primeira función en Cee, o monólogo chegará a Pontevedra con funcións o sábado 17 e o domingo 18 de outubro no Auditorio Sede Afundación. A resposta do público nestas dúas primeiras localidades marca o comezo dun percorrido que continuará durante os próximos meses por diferentes escenarios galegos.
A xira continuará en Vilalba, o 23 de outubro, e Ourense, o día 30, antes de percorrer outras localidades galegas ata finais de decembro. As entradas e a información actualizada sobre todas as funcións están dispoñibles en moianimal.gal.
NOTICIAS RELACIONADAS
Ainé estrea unha aplicación móbil para achegar a súa actividade ao público
A ferramenta reúne nun mesmo espazo a programación de espectáculos, as opcións de compra de entradas, as últimas noticias e os contidos audiovisuais da produtora. Está dispoñible de balde para dispositivos iOS e Android.
‘A Lacena Pequena’ chega a Triacastela cunha programación arredor do patrimonio e a natureza
A programación inclúe unha exposición de Ana Carballo, unha conferencia do antropólogo Rafael Quintía, unha degustación de produtos locais e actuacións de danza e música tradicional.
‘Territorio Regueifa’ chega hoxe ao Val do Dubra cunha función de balde
O Auditorio Municipal acolle ás 20.30 h unha nova representación do espectáculo, protagonizado por Lupe Blanco, Manolo Maseda e Josinho da Teixeira. A xira continuará en novembro con dúas citas en Barakaldo e Ames.