Novas funcións á venda de ‘Somos Criminais e punto final’
A xira do espectáculo de Carlos Blanco e Touriñán amplía os seus pases en Vilagarcía, Vigo e Narón. A gran demanda de entradas xa motivara a apertura de novas funcións en Lugo, Santiago e A Coruña. A xira comeza o venres día 1 no Auditorio de Galicia.
'Somos Criminais e punto final', o novo espectáculo de Xosé A. Touriñán e Carlos Blanco.
Este venres 1 de novembro, o Auditorio de Galicia en Santiago de Compostela acollerá a estrea de ‘Somos Criminais e punto final’, a última entrega da serie de espectáculos protagonizados por Carlos Blanco e Xosé Antonio Touriñán. A nova proposta, dirixida por Tito Asorey e con textos de José L. Prieto, leva aos espectadores nunha travesía cara a outro planeta, onde os cómicos, a bordo dunha nave espacial, embárcanse na misión de preservar o patrimonio cultural galego recreando con humor unha Galicia “criminal”.
Tras a súa estrea en Santiago, a obra continuará a súa xira por Galicia e a forte demanda de entradas levou á apertura de novas funcións en varias localidades. Na cidade picheleira case se esgotaron as entradas para os días 1 e 2 de novembro.
En Vilagarcía de Arousa, o espectáculo estará en cartel o 8 e 9 de novembro, cun total de catro actuacións, aínda que só restan entradas para a do día 8 ás 23.00 horas. Lugo, pola súa banda, acollerá dúas funcións o 29 de novembro. A xira tamén fará unha parada en Cangas o 16 de decembro, mais apenas quedan localidades para as dúas representacións que se farán no municipio pontevedrés.
En Vigo tamén se abriu un novo pase o día 21 de decembro ás 18.00 horas. O espectáculo poderá desfrutarse o 20 e o 21 con tres representacións no Teatro Afundación. Así mesmo, no Pazo da Cultura de Narón ampliouse unha nova función o día 17 de xaneiro, concello no que os cómicos estarán dous días.
Somos Criminais e punto final tamén espertou gran interese na Coruña, esgotando xa seis funcións. Para responder á elevada demanda, abríronse outros dous pases que permitirán ao público asistir ao espectáculo entre o 27 e o 30 de decembro, con dúas funcións diarias en cada xornada. Quedan entradas dispoñibles para o día 30 ás 23.00h e tamén para as dúas do 27 de decembro.
Consulta todas as datas e merca as túas entradas en somoscriminais.gal e na plataforma Ataquilla.
NOTICIAS RELACIONADAS
Unha nova etapa para ‘Territorio Regueifa’
O espectáculo de Lupe Blanco, Manolo Maseda e Josinho da Teixeira ofrecerá tres funcións durante esta fin de semana en Barakaldo e Laudio. Será a primeira vez que a proposta saia de Galicia desde a súa estrea en febreiro.
Zaragoza, a próxima parada do humor de Touriñán
O humorista actuará este sábado no Teatro de las Esquinas, nun percorrido que o levará de novo a Madrid en novembro. A xira continuará en 2027 con novas funcións en Madrid, Valencia, Santander e León.
A xira de ‘Moi Animal’ continúa colgando o cartel de esgotado
A nova proposta de Xosé A. Touriñán estará este venres 30 de outubro no Auditorio Municipal de Ourense, con dous pases, ás 20.30 e ás 23.00 h. A resposta do público continúa acompañando a xira, que xa ten varias funcións completas nas próximas semanas.