Touriñán participa na rodaxe de ‘Malencolía’, novo filme de Alfonso Zarauza

Malencolía é un filme de terror para televisión no que o director compostelán repite con boa parte do equipo técnico e artístico do seu anterior traballo Ons.

Xosé A. Touriñán participou esta semana na rodaxe que tivo lugar na provincia de Ourense.

Unha rodaxe chea de talento

Esta semanana rematou a rodaxe de Malencolía na comarca do Carballiño. Sete anos despois de Os Fenómenos, Touriñán e Zarauza volven traballar xuntos. O actor cullerdense incorporouse nesta última semana de rodaxe no Irixo. Trátase dunha longametraxe que, en palabras do director, busca tratar o terror dun xeito pouco convencional, partindo da tradición oral e literaria galega sobre o medo. O propio título fai referencia a un concepto que Curros Enríquez definía como “a felicidade de estar triste”.

O filme conta a historia dunha parella, interpretada por Melania Cruz e Xúlio Abonjo, que logo duns anos vivindo en Berlín regresa a Galicia para vivir no rural. Alí, instálanse nunha casa que pensaban abandonada, pero na que habita unha señora (Iolanda Muíños) coa que manterán unha estraña relación. Ademais do propio Touriñán, o elenco complétano Diego Anido, Ledicia Sola e Tito Asorey.

O director compostelán contou tamén con gran parte do equipo técnico de Ons, como Elia Robles na dirección de arte, Alberte Branco na fotografía, Tamara Soto na dirección de produción ou Fernando Alfonsín na montaxe. Galardoados ou finalistas todos eles nos últimos Mestre Mateo nos que Ons tamén levou o premio á mellor longametraxe.

Cinema Galego

Malencolía, producida por Maruxiña Film Company, é un filme rodado en Galicia, en galego e cun equipo 100 % galego e co patrocinio de Deleite. Ten prevista a súa estrea no outono no marco do OUFF – Festival de Cine Internacional de Ourense.