Touriñán e Carlos Blanco presentan a Gala Érguete, corenta anos de loita, emoción e homenaxe

A emoción e a memoria volven ocupar hoxe o Teatro Afundación de Vigo coa Gala Érguete, organizada para celebrar os 40 anos da Asociación Érguete e render tributo ás coñecidas nais contra a droga, pioneiras dunha loita que cambiou para sempre a historia social de Galicia. O acto, de entrada libre, comeza ás 20.00 horas e reunirá humor, música e lembranza.

A gala será presentada por Xosé A. Touriñán e Carlos Blanco, xunto a Arantxa Treus. En 2022, durante a xira da montaxe teatral Fariña (producida por Ainé e dirixida por Tito Asorey), Touriñán e a asociación compartiron un dos momentos máis emotivos daquela xira, cando as fundadoras de Érguete subiron ao escenario entre aplausos para recibir o cariño do público. Aquela colaboración marcou un encontro entre arte e memoria que fai que hoxe a presenza de Touriñán enriba do escenario sexa algo natural e simbólico: a escena volve converterse nun espazo de agradecemento e homenaxe ás mulleres que abriron camiño, rompendo o silencio, a soidade e a impotencia daquelas décadas difíciles.

A cita reunirá sobre o escenario a Fillas de Cassandra, A Banda da Loba, a escola de danza Media Punta, Sofía Gaona, Sara Balboa e ás pandereteiras Ledicia de Trasmañó. Ademais, as propias nais fundadoras e persoas usuarias da asociación participarán nun momento especial de recoñecemento e gratitude.

A vicepresidenta de Érguete, Sonia Fernández, sinala que este espazo é o que moitas delas merecían hai moito tempo. “Queremos que a sociedade galega poida agradecerlles todo o que fixeron cun gran aplauso”. A súa loita constante e a valentía das coñecidas nais contra a droga serán o eixo desta homenaxe a unha xeración de mulleres que cambiou para sempre a historia social de Galicia. Catro décadas despois, Érguete continúa a ser hoxe un referente na atención e reinserción de persoas con adiccións, con máis de 8.000 atendidas só en 2024 na área de Vigo.

Fundada en 1984 por un grupo de nais que afrontaban a drogodependencia dos seus fillos, a Asociación Érguete é unha das organizacións sociais máis emblemáticas do país. Acompaña a milleiros de familias cada ano e traballa pola inclusión social e a prevención de condutas adictivas, desenvolvendo programas educativos, xurídicos e de apoio residencial. 

A gala conta coa colaboración de Afundación e co apoio de institucións e persoas que, como lembran as súas fundadoras Dora Carrera e Elvira Vázquez, “fixeron posible que esta historia de dor se convertese nun exemplo de dignidade e esperanza”. Hoxe, sen dúbida, será unha noite de emoción, gratitude, memoria e, sobre todo, recoñecemento a aquelas matriarcas que axudaron a que a sociedade galega erguese a cabeza, nun momento histórico e social tan crítico.