‘Somos Criminais e punto final’ inicia en Santiago a súa última xira

A derradeira viaxe a un novo planeta está a piques de despegar. Carlos Blanco e Xosé A. Touriñán escollen ata principios do próximo mes de novembro ás afortunadas e afortunados que subirán na nave que levará o máis criminal da nosa forma de ser ao lugar que habitaremos cando neste mundo non haxa máis que facer.

Santiago (12 e 13 de setembro), Narón (27 de setembro), Vigo (4 e 5 de outubro), Vilagarcía (25 de outubro) e A Coruña (1 de novembro) son os lugares escollidos para a última xira de ‘Somos Criminais e punto final’, a terceira parte do espectáculo máis exitoso da historia do teatro en Galicia, que suma xa máis de 100.000 espectadores desde o 2018.

José L. Prieto é o autor, xunto con Carlos Blanco e Touriñán, da dramaturxia desta proposta, dirixida por Tito Asorey e que conta con Dani Juncal no deseño de iluminación, Carlos Alonso na dirección de arte, Santi Jul no deseño do espazo sonoro, e Laura Canto e Paco Abelleira na dirección de produción.

Ata o 1 de novembro, cando remate a xira na Coruña, o espectáculo reunirá nos teatros galegos a máis de 10.000 espectadoras e espectadores. As entradas están xa á venda a través da web do espectáculo.

A viaxe da nave Arteixo II

Falta pouco máis dunha hora para a fin do mundo. En Galicia, unha nave, a Arteixo II, está a piques de despegar cuns poucos elixidos a bordo en dirección a un planeta onde empezarán unha nova vida. Os capitáns da nave, Carlos Blanco e Touriñán, son os encargados de que a evacuación se leve a cabo con éxito e de meter nesta Arca de Noé galega todo o noso patrimonio humano, material e inmaterial máis prezado, para que a nova terra á que emigraremos siga sendo criminal.