- Preséntase o próximo día 4 de decembro na Illa de Arousa. O espectáculo pasará por 12 localidades galegas nos próximos meses
Logo do éxito de Somos Criminais, o espectáculo que máis entradas vendeu na historia en Galicia con máis de 50.000, Carlos Blanco e Xosé A. Touriñán están de volta… e media! Como segundas partes nunca foron boas, chega directamente Somos Criminais 3.
Somos criminais no sentido menos criminal da palabra? Temos unha maneira propia de ser e de estar? Somos diferentes, somos parecidos ou somos iguais aos demais? Son certos os tópicos que hai sobre nós? Estas son algunhas das preguntas ás que os dous cómicos tentarán dar resposta.
E é que en Somos Criminais 3, Carlos Blanco e Xosé Touriñán, analizan Galicia e os seus habitantes para saber como somos e para saber por que somos como somos. Un espectáculo completamente novo, que volve contar outra vez coa dirección de Tito Asorey e os textos de José L. Prieto, Carlos Blanco e Xosé A Touriñán.
Volver encher os teatros
Somos Criminais 3 aspira a continuar coa recuperación da normalidade, logo dun ano cos teatros pechados ou coa súa capacidade moi reducida, neste outono traballamos coa ilusión de recuperar as sensacións dos espectáculos en directo. A xira de Somos Criminais 3 pasará por 12 localidades galegas nos próximos meses co obxectivo de encher os teatros de público e risas.
As entradas estarán á venda na web do espectáculo a partir do día 11 de novembro.. A primeira parada será o día 4 de decembro, no Auditorio Municipal da Illa de Arousa. Despois, as funcións continuarán na Coruña, Ourense, Santiago de Compostela, Narón, Vigo, Lugo, Pontevedra, Burela, Vilagarcía de Arousa, Cangas e Ferrol.
