Presentamos no Culturgal as novas datas en Galicia de Fariña. Ademais levamos a Mercartes as nosas producións do último semestre e estreamos Táboas, unha revista semestral sobre o noso traballo.

Marta Lado, Graciela Carlos e César Goldi na presentación da xira 2022 no Culturgal. Foto: Yeray Diéguez

O Culturgal, a feira galega das industrias culturais, foi o lugar escollido para presentar a xira galega de Fariña. Logo de sete meses e máis de vinte localidades por toda España, o espectáculo dirixido por Tito Asorey regresa a Galicia no mes de marzo.

Marta Lado, César Goldi e Graciela Carlos achegáronse ata Pontevedra para presentar ao público congregado no Culturgal as datas deste regreso a Galicia de Fariña. Santiago de Compostela será a primeira parada dunha xira que os intérpretes agardan “con moita emoción e nervios” logo da boa acollida que está tendo a obra nestes últimos meses.

Nace Táboas, unha mirada de Ainé

Presentamos o primeiro número de Táboas no Culturgal. Foto: Yeray Diéguez

No Culturgal tamén tivo lugar a estrea de Táboas, unha revista semestral na que recollemos, ademais dos nosos últimos traballos, a mirada e opinión das e dos profesionais cos que compartimos camiño. Nacho Carretero, Xosé A. Touriñán, Tito Asorey, Melania Cruz ou Marianella Morena son algúns dos convidados neste primeiro número.

Logo da intensa fin de semana en Pontevedra, estivemos en Mercartes, a feira bianual das artes escénicas. Alí estivemos compartindo experiencias xunto coas compañeiras da Agadic e as compañías galegas desprazadas a Valladolid. Presentamos a versión en castelán de Táboas e mostramos o noso traballo no mercado máis importante das artes escénicas en España.