Somos Criminais 3 arrinca mañá, 4 de decembro, na Illa de Arousa un percorrido por doce localidades galegas. Trinta e tres funcións antes de rematar o ano na que averiguar se realmente somos criminais no sentido menos criminal da palabra.
Somos Criminais 3 é un novo espectáculo co que Carlos Blanco e Xosé A. Touriñán regresan aos teatros neste mes de decembro. Se en Somos Criminais analizaban os métodos criminais máis autóctonos, nesta terceira entrega intentarán averiguar se realmente somos criminais, pero no sentido máis positivo da palabra. E é que Carlos e Touri tiñan claro que non querian repetir a fórmula da primeira entrega.
Nesta ocasión, a escenografía conta cunha pantalla xa que o espectáculo incorpora un apoio audiovisual en certos momentos. Somos Criminais 3 está conformado por novas historias e personaxes escritas por Carlos Blanco, Xosé A. Touriñán e José L. Prieto. Tito Asorey repite como director dun espectáculo que mestura os monólogos, os sketchs… e tamén a música e o baile!
O primeiro pase terá lugar no Auditorio da Illa de Arousa este sábado 4 de decembro. O luns 6 chega ao Teatro Colón da Coruña onde terá un total de 6 pases ata o mércores 8. Esta primeira semana rematará con outros catro pases a fin de semana, 10 e 11 de decembro, en Ourense. Posteriormente chegará a Santiago de Compostela, Narón, Vigo, Lugo, Pontevedra, Burela, Vilagarcía de Arousa, Cangas e Ferrol.
Todas as datas e as entradas atópanse dispoñibles en na páxina web de Somos Criminais 3. Vémonos de novo nos teatros!
