‘Fariña’ estará na Mostra Internacional de Ribadavia o 18 de xullo

A adaptación teatral da obra de Nacho Carretero, que non se representaba desde o pasado mes de xaneiro, regresará ao escenario o próximo sábado 18 de xullo no festival de teatro ourensán.

A Mostra Internacional de Teatro de Ribadavia (MIT) vén de anunciar o seu programa para a edición deste ano, que se celebrará entre o 17 e o 27 de xullo. A adaptación teatral de Fariña, baseada na obra de Nacho Carretero, será un dos pratos fortes do evento e poderase ver o sábado 18 de xullo ás 23:00 no Auditorio do Castelo. As entradas estarán á venda a partir do 6 de xullo, mentres que os abonos para a Mostra xa están dispoñibles, tanto na páxina de Ataquilla como na oficina da MIT. 

Esta función suporá o regreso de Fariña aos escenarios, que levaba sen representarse desde o pasado xaneiro. O espectáculo sobre a historia do narcotráfico en Galicia, levado ao teatro por Xosé A. Touriñán e o propio Carretero, foi nomeado finalista en cinco categorías dos Premios María Casares de teatro pouco antes do confinamento. A Asociación de Actores e Actrices de Galicia, responsable dos galardóns, comunicou que a obra era unha das candidatas nas categorías de Mellor espectáculo, escenografía, iluminación e música orixinal. Ademais, o actor Sergio Zearreta tamén opta ao premio de Mellor actor protagonista. 

Fariña chega á Mostra Internacional de Teatro despois de ser vista por preto de 20.000 espectadores o pasado ano e de acadar o éxito entre público e crítica. Neste sentido, segue os pasos do libro orixinal e da serie, que lograron espertar interese tanto dentro como fóra de Galicia. 

A acción da peza dirixida por Tito Asorey non deixará que os espectadores quiten ollo da escena. A partir dunha impoñente descarga, sucedéranse conversas entre veciños e rapaces das vilas próximas que falan, compran e consomen con soltura o famoso Winston de batea. Os actores entrarán e sairán para dar vida a deceas de personaxes como o alcalde corrupto disposto a financiar unha verbena, os veciños máis novos que proban mercancía a escondidas… O elenco está composto por Marcos Pereiro, María Vázquez, Sergio Zearreta, Xosé A. Touriñán e Cristina Iglesias. 

A obra tamén conta cun tema orixinal propio (Que mal vai ter?) producido e interpretado para o espectáculo polo grupo Novedades Carminha.