‘Corentena’ remata a súa xira con dous cheos en Ourense e Lugo
Touriñán e Perdomo despiden o seu espectáculo logo dun ano de xira por salas e teatros nos que congregaron máis de 40.000 persoas. As dúas últimas funcións, en Ourense e Lugo, teñen colgado o cartel de non hai billetes.
David Perdomo e Touriñán desfrutan tanto ou máis que o público con 'Corentena'. Foto: Aigi Boga
No ano 2020, un insólito escenario paralizou o mundo e cambiou os nosos hábitos. Nese contexto de encerro e falta de conexión social, David Perdomo e Xosé A. Touriñán decidiron conversar en directo a través de Instagram e crear unha hora de comedia e evasión aberta a quen quixara pasar por alí. O experimento callou e milleiros de persoas conectábanse a esas conversas, interactuando cos cómicos, pedíndolles personaxes… Recuperada a normalidade, no 2023 Touri e David deciden transformar aquelas conversas nun espectáculo en directo.
Nacía deste xeito ‘Corentena’, un espectáculo no que Touriñán e Perdomo improvisaban personaxes e situacións sobre o escenario que bebían do espírito daquelas noites en liña. Co uso de máscaras e pequenos elementos de vestiario, recreaban personaxes nacidos naquelas noites de 2020 e creaban novas situacións e tramas delirantes.
O espectáculo resultou un éxito de público, enchendo salas, festivais e teatros en toda Galicia, superando os 40.000 espectadores nas máis de 50 funcións realizadas, enchendo practicamente todas as sesións.
Agora, a aventura chega á súa última fin de semana. Ourense e Lugo, 7 e 8 de xuño, poñen o punto e final ao percorrido de ‘Corentena’ con ambas funcións sen entradas dispoñibles.
NOTICIAS RELACIONADAS
Lamatumbá gaña o Premio Martín Códax da Música na categoría de Orquestras, Grupos e Música de Verbena
A banda ourensá vén de ser recoñecida na XIII edición dos Premios Martín Códax da Música, nun momento marcado polo regreso aos escenarios coa proposta ‘LAMATUMBÁ… E XA ESTÁ!’.
‘Amoriños’ despídese na Coruña cunha intensa fin de semana de seis funcións
O espectáculo de Xosé A. Touriñán e David Perdomo chega ao seu gran peche de xira no Teatro Colón. Entre o 5 e o 7 de xuño ofrecerán seis funcións, das que só queda dispoñibilidade para a derradeira sesión do domingo ás 20.30.
‘Amoriños’ encara a súa recta final cunha intensa fin de semana en Pontevedra
O espectáculo de Touriñán e Perdomo entra no último tramo da súa xira de primavera tras máis de dous meses de funcións por Galicia.