‘Corentena · Game Over’ encherá tres funcións na Coruña
O Auditorio Gaviota de Palexco recibirá a máis de catro mil persoas a próxima fin de semana no regreso de Xosé A. Touriñán e David Perdomo coa segunda parte do seu espectáculo xuntos.
David Perdomo e Xosé A. Touriñán, na estrea de 'Corentena · Game Over' en Pontevedra. Foto: Aigi Boga
Xosé A. Touriñán e David Perdomo esgotarán entradas unha vez máis na Coruña. Desta volta, con Corentena · Game Over, o seu novo espectáculo xuntos, que é á vez a segunda parte da proposta teatral que idiaron logo da pandemia, cando reunían cada noite a decenas de milleiros de galegas e galegos nos seus directos no Instagram.
Agora os cómicos coruñeses regresan aos escenarios co primeiro videoxogo-espectáculo, no que participa o público, multiplícase a presenza de personaxes, e cada función é unha divertida viaxe na busca do antítodo definitivo contra futuras epidemias. Pontevedra, Ourense e Burela xa tiveron ocasión de desfrutar da nova versión de Corentena, enchendo todos os pases programados.
O Auditorio Gaviota de Palexco (A Coruña) prepárase para recibir de novo a Touriñán e Perdomo por partida triple: están previstas funcións o sábado 29 ás 19.00 e ás 21.30 horas (coas entradas xa esgotadas), e o domingo 30 ás 18.00 horas, o único pase para o que aínda é posible mercar localidades. Logo da visita á Coruña a xira completarase coas representacións previstas en Vilalba (11 de abril), Vigo (12 de abril), O Grove (2 de maio) e Lugo (6 de xuño).
NOTICIAS RELACIONADAS
Xosé A. Touriñán recibe o Premio de Honra Manuel Lourenzo de Feteagal
O recoñecemento foi entregado o pasado sábado no Teatro Colón da Coruña, durante a gala dos I Premios Feteagal Manuel Lourenzo do Teatro Amador Galego.
Vedra, Boqueixón, A Rúa, Portas e Triacastela, as cinco paradas do primeiro percorrido de ‘A Lacena Pequena’
A primeira parada do proxecto será en Ponte Ulla, onde a Lacena desenvolverá unha programación cultural durante os días 18 e 19 de setembro. A iniciativa continuará posteriormente por concellos de menos de 5.000 habitantes.
‘A Lacena Pequena’ comeza en Vedra a súa primeira viaxe
O proxecto itinerante impulsado por Ainé e E-ló Arquitectura levará programación cultural a pequenos núcleos de poboación e dará a coñecer mañá en Ponte Ulla as cinco paradas do seu primeiro percorrido.