‘Corentena · Game Over’ despide a súa primeira xira o 6 de xuño en Lugo
O espectáculo de David Perdomo e Xosé A. Touriñán pasou desde o pasado mes de marzo por sete localidades galegas, sumando máis de 10.000 espectadoras e espectadores.
Touriñán e Perdomo encheron tres veces o auditorio de Palexco, na Coruña. Foto: Aigi Boga
Remata a temporada de espectáculos nos teatros e auditorios, e Corentena · Game Over despide a súa primeira xira en números de record. Desde o pasado 7 de marzo Xosé A. Touriñán e David Perdomo estiveron en Pontevedra, Ourense, Burela, Vigo, A Coruña, Vilalba e O Grove ofrecendo a máis de 10.000 persoas unha innovadora proposta a medio camiño entre o videoxogo e o teatro.
O Auditorio Gustavo Freire, en Lugo, despedirá o próximo 6 de xuño o percorrido dos cómicos coruñeses esta primavera, cunha función que está a piques de esgotar as entradas (as últimas, para as 20.30, pódense mercar en www.corentena.gal). Será a última oportunidade para ver a Touriñán e Perdomo nos teatros antes da temporada de verán, na que teñen previstas distintas citas cos seus espectáculos en solitario.
Sobre ‘Corentena · Game Over’
Pasado o tempo da pandemia entéraste de que o antídoto contra calquera novo virus está moito máis cerca do previsto. Decides emprender un emocionante camiño cheo de obstáculos e emocións para atopar o remedio a todos os teus futuros problemas. Unha viaxe chea de seres estraños, personaxes xa coñecidos e outras criaturas xamáis vistas. Serás quen de chegar ao final? Ollo! Calquera fallo levarate ao Game Over!
O novo espectáculo de Xosé A. Touriñán e David Perdomo recolle o espírito das súas conversas en Instagram durante a pandemia para levalo por segunda vez aos escenarios. Desta volta acompañados dunha gran pantalla na que as espectadoras e espectadores tamén son protagonistas.
NOTICIAS RELACIONADAS
‘Amoriños’ chega ao Noroeste Estrella Galicia cunha edición especial en Santa Margarida
O espectáculo de Xosé A. Touriñán e David Perdomo formará parte da programación da 39 edición do Festival Noroeste Estrella Galicia cunha función especial o 9 de agosto.
Xosé A. Touriñán incorpórase ao elenco da terceira e última tempada de ‘Clanes’
A serie de Netflix producida por Vaca Films despídese cunha última entrega que volve reunir a Clara Lago e Tamar Novas como protagonistas, xunto a un amplo elenco do que forma parte Xosé A. Touriñán. A tempada final pecha a historia deste universo do narcotráfico en Cambados.
Máis improvisación oral para despois do verán: ‘Territorio Regueifa’ suma tres novas funcións
O espectáculo regresará aos escenarios en outubro e novembro con tres novas funcións xa confirmadas. Entre elas destaca a primeira representación fóra de Galicia, que terá lugar en Barakaldo.