No centenario do nacemento da actriz galega máis universal, presentamos este espectáculo que dialoga coa extraordinaria figura de María Casares. A estrea de Continente María terá lugar o 16 de maio no Teatro Rosalía de Castro da Coruña.
Neste 2022 conmemórase o centenario do nacemento de María Casares, a máis internacional das nosas actrices. Personalidade imprescindible do teatro da segunda metade do século XX, Casares nunca volveu á terra que a viu nacer logo do exilio forzado polo Golpe de Estado do 36. Establecida en Francia, o seu talento e personalidade traspasou fronteiras e deixou unha fonda pegada e un legado escénico extraordinario. Regresa agora a Galicia a través da sua patria, o teatro.
Continente María é un canto á vida e ao teatro a través do diálogo coa figura de María Casares. Mediante as múltiples posibilidades que nos ofrecen as táboas, evocamos a María non só como a inesquecible actriz que foi, senón tamén como o ser humano que se entregou con absoluta intensidade á vida e á escena para vencer o medo e sobrepoñerse ao exilio.
Conversamos con María Casares, recollendo a retranca, o humor e a musicalidade que se desprende dos seus textos e entrevistas, para conformar un espectáculo que busca explorar no seu legado na procura de luz nun momento no que tan precisos son referentes de liberdade e compromiso.
Á falta de terra propia, acharía unha tan grande como o vasto mundo: o escenario, onde se pode inventar toda clase de vidas, e os mortos regresan para saudar
María Casares
Un equipo internacional
Este espectáculo nace da investigación constante sobre María Casares que o director Tito Asorey e a actriz Melania Cruz levaron a cabo durante anos. Uniron forzas coa dramaturga uruguaia Marianella Morena e co compositor e multinstrumentista bielorruso Vadim Yukhnevich para construír un espectáculo que busca achegarnos a María Casares desde unha perspectiva contemporánea e atractiva para todo tipo de públicos.
Continente María é unha coprodución de Ainé, A Quinta do Cuadrante, o Concello da Coruña e o Centro Dramático Galego. Estrearase o 16 de maio no Teatro Rosalía de Castro da Coruña e logo estará do 19 ao 22 e do 26 ao 29 no Salón Teatro de Santiago de Compostela. As entradas estarán dispoñibles nas próximas semanas.
