Será un programa especial no que tamén participarán Tito Asorey, director do espectáculo, e José L. Prieto, autor da peza. Poderase seguir na mesma emisión do espectáculo, e tamén a través de Facebook Live nas páxinas de Touriñán, Carlos Blanco e Ainé Producións.
A do sábado será unha noite intensa para as seguidoras e seguidores de Carlos Blanco e Xosé A. Touriñán. Ás 22.30 comezará unha das funcións de teatro máis agardadas: hai un par de semanas os actores anunciaban o primeiro espectáculo teatral en streaming producido en Galicia, con aforo limitado e non gratuíto. Unha iniciativa que ás poucas horas xa suscitara o aplauso unánime do público, e que con preto de 3000 accesos vendidos supera xa hoxe todas as expectativas.
A noite non rematará o sábado coa función: logo de hora e media de risas, os actores compartirán un tempo de conversa en directo, desde as súas casas, nunha emisión que poderá seguirse a través de Facebook Live. Estarán acompañados de Tito Asorey, director de Somos Criminais, e José L. Prieto, autor da obra, que comentarán a experiencia desta produción teatral na rede, e contestarán as preguntas que as espectadoras e espectadores queiran realizar a través das redes sociais.
Será o peche dunha noite na que o teatro galego ampliará as súas posibilidades de difusión con este proxecto inédito no noso país: nunca antes un espectáculo non gratuíto chegara aos espectadores a través das pantallas.
