‘Aquí Tou!’ chega esta fin de semana á Estrada á Rúa
Despois de abrir en Ribadumia a súa xira de outono con gran acollida, ‘Aquí Tou!’, o monólogo máis persoal de Xosé A. Touriñán, continúa o seu percorrido por Galicia. Esta fin de semana toca dobre parada, con case todas as localidades esgotadas para as catro funcións programadas.
Xosé A. Touriñán durante unha función de 'Aquí Tou!'. Foto: Aigi Boga
O público respondeu con entusiasmo ao regreso de Aquí Tou! aos escenarios na pasada fin de semana, confirmando o éxito do monólogo máis persoal de Xosé A. Touriñán. O espectáculo continúa agora a súa ruta polos teatros galegos e fará parada esta fin de semana en A Estrada e A Rúa, con catro funcións que prometen volver encher os auditorios de humor, emoción e complicidade.
Desta volta, a parada será dobre. Este venres 14 de novembro, o Teatro Principal da Estrada acollerá dúas funcións, ás 20.30 e ás 23.00, ambas con todas as entradas esgotadas. Ao día seguinte, sábado 15, o espectáculo chegará ao Centro Cultural Avenida da Rúa, onde haberá tamén dúas sesións, ás 18.30 e ás 21.00, coas últimas localidades dispoñibles.
En Aquí Tou!, Touriñán percorre con humor e tenrura os momentos máis significativos da súa vida, mesturando realidade e ficción, anécdotas persoais e cultura popular galega. O resultado é un retrato vital no que o público se recoñece, participa e se emociona, mantendo o espírito próximo e festivo que define o seu humor.
O espectáculo, escrito xunto a José L. Prieto, continúa a consolidarse como un fenómeno teatral galego, con máis de trinta e cinco funcións e milleiros de espectadoras e espectadores desde a súa estrea.
As seguintes paradas serán Vimianzo, Rianxo, Ribeira e Salceda de Caselas. As últimas entradas poden adquirirse a través da web do espectáculo, aquitou.gal.
NOTICIAS RELACIONADAS
Un novo espazo dixital para seguir a traxectoria de Xosé A. Touriñán
A páxina recompila toda a información profesional do actor, director e produtor nun espazo renovado, accesible e estruturado arredor da súa traxectoria, proxectos e actividade actual.
A xira estatal do monólogo de Touriñán segue medrando e suma novas datas
O espectáculo de Xosé A. Touriñán continúa ampliando o seu percorrido fóra de Galicia cun calendario que segue incorporando funcións ao longo de 2026 e comezos de 2027.
Lamatumbá, finalista nos XIII Premios Martín Códax da Música
A banda ourensá opta ao galardón na categoría de Orquestras, Grupos e Música de Verbena, reafirmando o seu lugar como un dos grandes referentes da festa e da música popular galega.